آخر كلام

 القرار الذى "نسيه" وزير الكهرباء..!
وزير الكهرباء أصدر 8 قرارات تنفيذًا لتوجيهات الرئيس بتخفيف أعباء فواتير الكهرباء عن المواطنين؛ لكنه نسى أو تناسى أهم قرار هو سبب الظلم الذى يشعر به الشعب؛ وهو تعديل نظام "الحساب" الذى تحول لـ"عقاب" لكل المواطنين من أسوان لراس التين..!!
فمن الظلم أن يعاقب المواطن أكثر من مرة بسبب تجاوزه لحد الاستهلاك الذى حددته الكهرباء.. يعنى بالعربى كدا.. حاسبونا لكن لا تعاقبونا.. لأنها بصراحة مش ناقصاكم..!
 مجلس النواب .. فين..؟!
هو فين مجلس النواب من اللى بيحصل حولنا.. متهيألى إن المجلس يجب أن يتحرك فورا لرفع الظلم الواقع على الناس من فواتير الكهرباء.. ومتهيألى برضه إن المجلس كان يجب أن يتحرك للرد على مقترحات رهن أصول مصر على طريقة محلات البيع قطاعى بسعر الجملة..!
ومتهيألى إن المجلس يجب أن يكون له موقف حازم من التهديدات الإثيوبية بالمساس بحقوق مصر في مياه النيل ..
حاجات كتيرة بتتهيألى مش ها أقولها.. لأنه من الواضح إنى بانفخ فى قربة مقطوعة..!
 يا أصحاب المعالى.. نقطونا بسكاتكم..!
والله العظيم قلتها مرات ومرات لأصحاب المعالى وزرائنا الموقرين.. بلاش الحركات التلفزيونية والتصريحات العنترية لأنكم مش بتكسبوا شعبية إنتم بتستفزوا الناس وبتعملوا كوارث على الهواء مباشرة..!
واللى مش مصدقنى.. شوفوا تصريحات الأسبوع اللى فات.. وإزاى الناس اشتغلت عليها تريقة للصبح.. وإزاى إعلام ولجان اللى مايتسموش استغلوها وهاتك يا هرى..؟!
للمرة العاشرة أقولها ورزقى على الله: يا أصحاب المعالى.. الظروف الراهنة لا تحتمل.. والحكاية مش ناقصاكم.. أرجوكم نقطونا بسكاتكم..!
 هجص فى هجص..!!
أقوى رد على الكلام الحلمنتيشى برهن قناة السويس مقابل الديون هو ما قاله الدكتور يوسف بطرس غالي : كله هجص فى هجص..!!
 بلاها سوسو.. خد نادية..!
الأفندى "إياه" بعد أن صدمنا باقتراحه العبقرى برهن القناة.. رجع يقول بكل بجاحة: إذا كانت قناة السويس وجعاكم قوى.. بلاها القناة.. شوفوا لنا أصل تانى نرهنه..!
يعنى "بلاها سوسو خد نادية".. على طريقة الفنان فؤاد المهندس..!!
إيه الكلام ده.. هى الناس دى مابتزهقش..؟!
 إعلام ما قال لى وقلت له..!
فى الوقت اللى الإعلام المعادى ولجانه شغالين أكاذيب ومحاولات لزرع الفتنة.. نلاقى بتوع إعلام ما قال لى وقلت له شاغلين الناس بمشاكلهم الشخصية والدفاع عن أنفسهم وتلميع بعضهم البعض..!
أين المسئولين عن الإعلام من هذا العبث..؟
لسه معانا على الخط.. وللّا عاملين نفسهم من بنها..؟!
 يا راجل يا محترم.. إيه كل ده..؟! رقص وتنطيط وأغانى نشاز.. إنت خليت إيه لبتوع المهرجانات..؟!
ليه حق بيكا وأستيكة وشطة ووزة وبطة يقعدوا على الحيطة ويسمعوا الزيطة..!