واضح إن اللى عامل فاتورة الكهرباء من عشاق فيلم «أبو حلموس» لنجيب الريحانى.!
فالفاتورة مليانة إتاوات عشوائية تحرق الدم من عينة إتاوة خدمة العملاء والزبالة ومصاريف أخرى.. على طريقة «الشىء لزوم الشىء» بتاعة عمنا الريحانى..!!
بصراحة اللى عمل الفاتورة دى إيديه تتلف.. «فى حديد»..!!
أنا زعلان جدًا من الجامعة الخاصة التى كرمت ثلاث ممثلات ومنحتهن جوائز التفوق فى البحث العلمى.. دا كلام..؟!!
دا تهريج وعيب.. والله عيب..!!
معقولة تكرّموا الممثلات وتنسوا.. راقصة مصر الأولى والأخيرة، اللى «اخترعت» الرعشة و«نطرة القبة»..؟!!
لن يغفر لكم التاريخ هذه السقطة أبدا.. أبدا.. وكمان أبدا..!!
سؤال ساذج جدا لرئيس جامعة القاهرة: هل صحيح أن الجامعة تعاقدت مع مستشفى خاص لعلاج العاملين بها، رغم أن الجامعة يتبعها 17 مستشفى جامعيا منها قصر العينى أضخم صرح علمى طبى فى المنطقة، ومعمل تفريخ العلماء ونوابغ الطب فى مصر والعالم..؟!
إذا صحت هذه الواقعة فهى إهانة واستهانة بعلمائنا فى قصر العينى ومستشفياتنا الجامعية، وهى جريمة يجب أن يحاكم مرتكبها مرتين.. مرة بتهمة إهدار المال العام.. ومرة ثانية بتهمة الغباء المطلق وعمى البصر والبصيرة..!!
والله العظيم حرام إن طريق القاهرة الإسكندرية الصحراوى، الذى كنا نفخر به جميعا يصبح بهذه الحالة المتردية التى لا ترضى عدوا ولا حبيبا..!
فالطريق مليء بالحفر والمطبات التى قد تؤدى لكوارث لا قدر الله..!
يا ريت ننقذ الطريق بسرعة حتى لا يتحول من طريق «القاهرة - الإسكندرية» إلى طريق.. «اللى يروح ما يرجعش».. ربنا يستر..!!
الناس على الفيس بوك هاتك يا هرى على المزايا التى يحصل عليها أى صاحب معاش فى بلجيكا.. كهرباء مخفضة.. إيجار بيته بينزل للنص والحكومة بتدعمه.. علاج مجانى.. علاج الأسنان إجبارى ومجانى على نفقة الدولة.. وحاجات كتيرة ومحتاجات كلها تدليل لمن يصل لسن المعاش..!!
وإيه يعنى.. ما هو ده نفس اللى بيحصل عندنا فى مصر بالضبط..!!
سامحنى يا رب..!
يا ريت أشرف زكى، نقيب الممثلين، يصدق فى وعيده لـ «نمبر وان» ويتخذ ضده إجراء صارما بعد إهانته للفنانة سميرة عبدالعزيز، وما يطلعش زى الريس حنفى شيخ الصيادين اللى كلمته ما بتنزلش الأرض أبدا..!!