رد المطرب والملحن محمد سراج على الفنانة حلا شيحة بعد بوست طويل تتبرأ فيه من فيلم "مش أنا" للنجم تامر حسنى، ومن مشاهدها في أغنية "بحبك"، والتي جاءت ضمن أحداث الفيلم، وهى عبارة عن مشاهد رومانسية تجمعها ببطل الفيلم تامر حسنى.
وكتب ملحن أغنية بحبك، عبر خاصية ستورى على حسابه على "إنستجرام"، قائلا "أستاذة حلا إحساسك إيه دلوقتي ومحدش مصدقك، وطبعا عارفة محدش مصدقك ليه ؟؟ كان أكرملك تتبرأي وتتوبي من الفيلم بينك وبين ربنا بس واضح إن الخناقة بينك وبين جوزك كانت كبيرة وده بيأكد إن البوست مش إعلان توبتك إلى الله على قد ما هو بيصالحك على جوزك "جوزك متجوزكيش وفاكرك مدرسة دراسات واتفاجئ بعد كده".
وتابع سراج: "إنتى غريبة ومتناقضة جدا الفيلم بقاله 3 أسابيع بنفس المشاهد اللي حضرتك صورتيها بإرادتك و أصلا مشاهد مش أوفر ده مش عشانك عشان دي طبيعة تامر في أفلامه وكليباته مفيش مشاهد أوفر واللي واخدة أجرك عليها".
وأضاف: "هل اللي صورت المشاهد دي عفريته ,سيادتك هل اكتشفتي امبارح بس بعد نزول الكليب، الكليب ما هو إلا مشاهد مجمعة من الفيلم مشفناش الحرقة دي والتوبة دي والكلام في تفاصيل مشاهد مضايقاكي فى أفلامك اللي فاتت اللى بتتعرض على التليفزيون وبتنصحي زمايلك إن الشهرة عامياهم على أساس إن توبتك كل اثنين وخميس اللي بتنشريها على السوشيال ميديا دي إيه مش شهرة حضرتك زيك زي اللى بيتاجروا بالدين يحضرني مشهد اللي هو بيبقي فى الأفلام ده ومكتوب وبعد مرور 3 شهور بتكون البطلة اتطلقت ورجعت تاني وتمثيل تانى وتلبس تانى وتتصور تانى وتقول ظروف".