عرض برنامج "التاسعة" الذى يقدمه الإعلامي يوسف الحسيني، عبر القناة الأولى المصرية، تقريرا يكشف قصة كفاح السيدة "أم محمد" عاملة بمدرسة في بورسعيد في رحلة كفاح استمرت لـ55 عاما.
وقالت "أم محمد"، خلال التقرير: أنا الشهيرة بأم محمد، معرفش سني، ولما جيت هنا بيقولولي كان عندك 30 سنة، كان يوم ما السادات استلم كفن أخوه عاطف السادات، وجيت هنا لما جوزي توفى عشان أربي العيال.
وتابعت: الأستاذ بيان سلمني المدرسة والمفاتيح، وكانت الدنيا مهاجرة في رأس البر، ومهجرتش، وبستلم العيال من هنا، ويجوا بعدين ياخدوهم، وآخر الشهر يدولي الفلوس".
وأضافت: باجي 5 الصبح أصلي الفجر وأفتح المدرسة والمكاتب أروقهم لحد ما المدرسين يمضوا في الدفاتر، ويجي الأستاذ عزيز أعمله القهوة وأستقبل الأولاد والخروج الساعة 1 حضانة، و2 الكبار، ولما يمشوا أقفل وأطلع للعمال أبقى معاهم، ولما يخلصوا أخرجهم وأقفل المدرسة وأستنى مع الأستاذ عزيز لما يخلص شغله وبعدين نخرج من المدرسة.
وأردفت: ما باخدش إجازات خالص، معايا واحدة مدرسة والتاني مع خاله جزار، وبيقولولي اقعدي يا ماما وأقولهم مقدرش، وسابوني براحتي.
واستكملت: سألت الأستاذ عزيز ينفع أدفن في المدرسة، ضحك وقالي ما ينفعش، بس قلتله أعدي بالنعش قدامها، وأمنيتي أحج أو أعمل عمرة.