قام الرئيس عبد الفتاح السيسي، صباح اليوم الإثنين، بتفقد مجمع بنبان للطاقة الشمسية بمحافظة أسوان، كما افتتح عدداً من المشروعات التابعة لقطاع الكهرباء بمحافظات الصعيد.
جاء ذلك في إطار الافتتاحات والمشاريع التنموية التي قام بها الرئيس، لتنمية الصعيد والارتقاء به.
و أدلي الرئيس عبد الفتاح السيسي، بمجموعة من التصريحات المتعلقة بتنمية الصعيد، قائلا: «امبارح كنا في توشكى، وأتصور الزملاء اللي كانوا معانا أول مرة يدخلوا ويشوفوا، خلوا الناس تيجي وتشوف في المحافظات والجامعة اللي هنا، وتشوف في توشكى وشرق العوينات، خلوا الناس يبنوا الأمل لأن الناس بتشكك في اللي موجود».
وتابع: «حبينا نقول للناس أن حجم الجهد والتكلفة المالية اللي الدولة حطتها لأهلنا فى الصعيد ودا مش من عليهم.. دا شغلنا ولو معملناهوش نبقى مقصرين».
وأضاف: «وخلوا الناس تشوف المشروعات اللى اتعملت فى توشكى وغيرها».
وتابع: «عايزين معنويات الناس ترتفع وثقتهم بنفسهم تزيد من خلال قدرة الدولة فى تحسين وضعها».
كل مشروع بنعمله هو سد عالي على الأقل
وتابع: «كل مشروع بنعمله هو سد عالي على الأقل، وعاوزين الناس تشوفه عشان معنوياتها ترتفع وثقتها في نفسها تزيد، وتعرف إن الدولة قادرة تعمل أكتر من كدا».
وأوضح: «لو إحنا ودينا الناس المحطة اللي إحنا فيها النهارده دي، الطيارة كانت ماشية فوق المحطة حوالي 5 دقايق، حاجة رائعة جدا، المحطة دي القطاع الخاص بيشغلها بأهل الصعيد، وأهل الصعيد أولى بالمشروعات اللي بتتعمل هنا، وأرجو ندي فرصة لشباب وشابات الجامعة والمدارس يروحوا يشوفوا إن الأمور ماشية ناحية الأفضل».
وعن كم الأموال الهائلة التي تم إنفاقها، لتنمية الصعيد والارتقاء به، فقد وصلت إلي تريليون و 100 مليار جنيه، حيث قال الرئيس: «الاهتمام مش بالكلام فقط.. في حد من كام يوم قالي ندي الناس مش عارف كام.. اضحك عليكم بـ100 ولا 150 جنيها وأسيبكم بدون كهرباء، وصرف و خدمات ومياه ؟».
انقطاع الكهرباء يسبب مشاكل كثيرة
وأشار الرئيس، الي أن الكهرباء تستخدم فى تشغيل المصانع، وفى حالة قطع الكهرباء كانت ستتسبب فى إغلاق المصانع، وبعد ذلك يتسبب فى مشكلات كبيرة.
ولفت إلى أن الدولة وفرت الخدمة بشكل جيد، وفى المقابل يتم الحصول على مقابل الخدمة، متابعا: «لازم كل واحد ياخد حقه».
قطاع الكهرباء شهد ظروفا صعبة في الدولة
وأضاف أن قطاع الكهرباء شهد ظروفا صعبة في الدولة المصرية قبل البدء في تطويره بشكل كامل.
مؤكدا: " قطاع الكهرباء في كل شيء كان صعب جدا وفي موضوع الطاقة.. وماشيين في الطاقة ومش اقصد على الكهرباء بس.. إحنا لما اتكملنا عاوزين مصر فيما يخص الطاقة الكهربائية سواء إنتاج أو توزيع أو تحكم زيها زى أي دولة متقدمة جدا في المجال".
السيسي يدعم وزير الكهرباء:
وفي ذلك السياق، وجّه الرئيس الشكر للدكتور محمد شاكر، وزير الكهرباء والطاقة المتجددة، على الجهد المبذول في قطاع الكهرباء، قائلا: باسم كل المصريين، فرصة نتكلم عن الدكتور شاكر كزميل لينا، وعن الجهد اللي بذله الفترة اللي فاتت، في مشكلة من أكبر المشاكل اللي قابلتنا في مصر، إحنا بنتكلم عن جهد وزارة على رأسها عالم فاضل، قدر من خلال جهده وعلمه يحقق نقلة كبيرة جدا في الكهرباء بمصر، وكانت في السنين اللي فاتت الظروف صعبة جدا في الطاقة في مصر إلا أننا ماشيين في اتجاه الطاقة في مصر، وهتكون حاجة تانية».
وأضاف: «عاوزين مصر تكون زي أي دولة متقدمة في الطاقة الكهربائية، وده اللي خلانا لما نيجي نتكلم عن الربط الكهربائي بدول الجوار نقدر نعمله، لأن العالم كله جاهز للربط الكهربائي».
عدادات كهرباء مسبوقة الدفع
وخلال حواره، وجّه سؤالا إلى الدكتور محمد شاكر، وزير الكهرباء والطاقة المتجددة، عن إمكانية تغيير عدادات الكهرباء بأخرى مسبوقة الدفع، قائلا: «في ناس بتشتكي إنّ القراءة مش مظبوطة، فهيبقى العداد معاك وأنت اللي تشحنه ومحدش يقرالك وتنظم استخدامك».
تبقى دي الخطة، نخلي عدادات الدولة المصرية مسبوقة الدفع، عشان نتجاوز مشكلة القراءات غير المسبوقة».
وأشار انه تحدث مع وزير الكهرباء من قبل عن مشاكل القطاع، مؤكداً، على عدم الإضرار بالقطاع، حتى لا تُؤذى الشركات الخاصة العاملة في مصر:
قائلا: «المصانع لو قفلت الناس هتمشي .. والناس هتبقي بره والبلد دي هتتهد، ولابد من حل المشكلة في أسرع وقت ممكن، وخطة وزير الكهرباء العاجلة كلفت الدولة 2 مليار جنيه كنا ممكن منتكلفهمش لو مشينا بالمسار الطبيعي دون الخطة العاجلة، بس مفتكرش إننا كنا هنستحمل سنتين بالصورة اللي ماشيين بيها».
وأضاف، إنّ عرض وزير الكهرباء «محمد شاكر»، لم يتطرق إلى جودة التحصيل أو حجم الفاقد في قطاع الكهرباء: «اللي بنعمله ده ومستهدفينه بنحصله ولا لأ، لو بنحصله يبقي ناجحين، ولو مش بنحصله هيبقي فيه عجز هتتحمله الدولة، والدولة لن تستطيع لأن أعباء تلك المشروعات ضخمة».
دول تعاني من مشكلات الكهرباء منذ 15 عاما
وأكد أن هناك دول تعاني من مشكلات مزمنة في قطاع الكهرباء منذ 15 عامًا ولم يتم حلها، مما يؤثر علي الأمن القومي للبلاد قائلا: «أحنا كنا شايفين إن الأمن القومي في مصر ممكن يتأثر جدا بالحته دي، ثم إننا نكون دولة ذات شأن وننمي أنفسنا وندي فرصة للقطاع الخاص والاستثمارات والصناعة إنها تنمو وتستقر، لأنه لو مفيش كهرباء الناس مش هتشتغل وتتقفل المصانع».