ريم مصطفى: ملامحي بتحصرني في مكان معين.. ومحدش يصدق إني قدرت أعمل دور بنت بيئة

أنا بحب الأكل جداً وبكره الدايت وطباخة شاطرة حتى "السي فود" بعمله ولو لقيت محشي في الثلاجة بليل هاكله

مش بكره الرجالة لكن دمهم تقيل وبحس أننا كائنات جايين على كوكب مضطرين نتعامل معاهم فبيحصل التصادم

كشفت الفنانة ريم مصطفى أن كثيرا من الأدوار في الأعمال التي تشاهدها تسبب استفزازاً لها قائلة: بتحصل كتير أوي بشوف أدوار تستفزني واقول كان نفسي أعمل الدور ده "

ورداً على سؤال الاعلامية لميس الحديدي: هل جمالك حصرك في أدوار معينة؟ قالت خلال لقاء "عبر برنامج "كلمة أخيرة" الذي تقدمه الاعلامية لميس الحديدي على شاشة ON": بالفعل ده بيحصل وكل شيء له ميزة وعيب أنا شكلي خادع بطبيعة الأمر عن الكراكتر الاصلي بتاعي يعني محدش يتخيل أني أعمل دور واحدة "بيئة" أو شعبية "رغم أن أول "أوديشن" قمت به "كان مشهد ل نبيلة عبيد في شادر السمك ولما دخلت هبة رجل الغراب مكنش حد يتخيل أني جاية من شادر السمك "

موضحة أنها تتمنى تقديم شخصيات وأدوار أخرى بخلاف الادوار التي حصرتها فيها ملامحها الشقراء قائلة: "الكراكتر بتاعي يقدر يقدم حاجات كتيرة مختلفة"

وعن حياتها الشخصية ومدى إتباعها لنظام غذائي قالت: "أنا بحب الاكل جداً وبكره الدايت بس في بعض الاوقات لما الدنيا بتبوظ ببدأ أركز أني أخلي بالي ورغم أني طويلة بس زيادة الوزن بتظهرعليا وبلعب رياضة من وقت لآخر بدون انتظام خاصة لو فيه تصوير "

واصلت: أنا بحب أدخل المطبخ وبعمل أكل حلو جداً ولو دخلت المطبخ بليل ولقيت محشي في الثلاجة هاكله ومش هيفرق معايا خالص وبحب أطبخ جداً وبعمل كل الاكل الي ممكن تتخيلوه أنا طباخة شاطرة حتى "السي فود" بعمله"
وأكملت: "أنا مقتنعة أن اللي بيحب الاكل لازم يعرف يطبخ "

ومازحتها الحديدي قائلة: ياهناه ياسعده، متسائلة: إيه تاني أسوأ حاجة بعد الدايت؟ لتجيب مازحة: "الرجالة" مش بكرهم بس دمهم تقيل أنا حاسة ان الستات كائنات مختلفة واضطروا يتحطوا في كوكب ويتعاملوا مع بعض عشان كده بيحصل تصادم "

ورداً على سؤال الحديدي : ماهي أكثر الاشياء التي تكرهها في الرجال؟ تجيب قائلة: أنا شايفة ان أكتر أمر مهم بين الرجل والست أن يحترموا اختلافتهم لكن طول الوقت الرجالة بتحاول تخلي اللي قدامها شبهها أو العكس صحيح لكن لو احترمنا أن ربنا خلقنا كائنات مختلفة فالامر سيختلف وهتبقى الدنيا تمام .