إلى أصحاب المعالي وزرائنا الأفاضل:
طالما إن وظيفة المتحدث الرسمي دي.. وظيفة سقع.. بتخلي صاحبها برنس.. فأنا عايز ألفت نظر معاليكم إلى إن العبد لله أحسن واحد فى العالم "بيتحدث رسمي"..!
فأنا خريج أول دفعة من كلية الإعلام قسم "تحدث رسمي"..!!
وعندى خبرة خمسين سنة كلها "تحدث رسمي".. دقة قديمة من اللي قلبك يحبها..!
وكل حديثي حتى مع أهلي وناسي رسمي.. فهمي.. نظمي..!!
وفوق كل ده وده.. باأصلح ساعات فى أوقات الفراغ..ولهلوبة فى الطبيخ وتغيير لفف العيال..!!
ياريت تشوفوا لي شغلانة "متحدث رسمي" بدلا من حكاية الكتابة اللي مش جايبة همها..!
آه نسيت أقول لكم إن من مؤهلاتي الجامدة جدًا إنى طول عمري بأجاهد.. يعني "مجاهد" قديم..!!
هذه هي بعض مؤهلاتي.. وأى تشابه فى الأحداث أو الأسماء مع أي "مجاهد" تاني.. فدا من قبيل الصدفة اللي هى خير من ألف ميعاد.. سامحني يارب..!
× إيه اللي خلى الدكتور "نقصان" يفتكر دلوقت فيل أبرهة الحبشي وإزاي كان بياكل وإزاي كان بيشرب..؟!
هو أي هري وتشكيك فى كلام ربنا وخلاص..؟
بالمناسبة.. أموت وأعرف الأخ "نقصان" واخد الدكتوراه بتاعته فى إيه..؟! أكيد هو "دكتور فى حتى".. لأنه بيتكلم فى كل حاجة وأي حاجة؛ وكأنه أبو العريف اللي ماجبتوش مقنعة..!
ياجماعة الهري واللت والعجن ده فى كيف قطع فيل أبرهة الحبشي المسافة من اليمن لمكة وإزاي كان بياكل وبياكل إيه..؟!
كل الهردبكش ده من نوعية العلم الذي لا يفيد والجهل الذي لا يضر..!!
× وبدون زعل برضه.. إيه اللي خلى شيخنا الجليل (ع.ج) يفكرنا بأن اسم فيل أبرهة هو "محمود".. يعنى لو اسمه خليل أو سعيد هاتفرق يعني؟!
دا برضه كلام من نوعية العلم الذي لا يفيد والجهل الذي لا يضر..!
× عيب قوي إن البعض على وسائل التواصل الاجتماعي يقولوا إن اتحاد الكرة .."اتحاد كفتة" لامؤاخذة..!!
يا جماعة عيب.. كفتة إيه وطرب إيه..؟! مالقيتوش غير الكفتة يعني..؟!
فين الباتنجان.. وفين الكوسة وفين القرع.. وفين البامية..؟!!
يا جماعة ذنبها إيه الكفتة.. أنتم كدا بتكرّهوا الناس فى الكفتة..!!
× اللي زعلانين قوي من إننا اتهزمنا من كوريا الجنوبية بالأربعة.. يحمدوا ربنا ويبوسوا إيديهم وش وضهر.. إننا مالعبناش كوريا الشمالية..!!
فأخونا كيم جونج اون زعيم كوريا اللي مابيعجبوش الحال المايل، ومابيعرفش هزار، كان شحنهم لآخر الدنيا فى صاروخ نووي من صواريخه العابرة للقارات هم وكبيرهم اللي علمهم السحر.. "الكابتن هوبة" اللي فضحنا بكل لغات الدنيا.. فضيحة اللحمة البتلو فى سوق الجمعة..!!