أنا زعلان قوي من العالم المصري الدكتور محمود جعفر، اللي توصل لطريقة لتحميل ونقل البيانات بسرعة تماثل سرعة الضوء بالتعاون مع علماء ألمان..!
يعنى يا دكتور ماكنتش قادر إلى جانب أبحاثك العلمية الخطيرة دي، تلعب شوية كورة.. كان زمانك دلوقت أشهر من نار على علم.. وضيف دائم على برامج التوك شو.. وحديث مصر كلها..؟!!
لكن نقول إيه ناس ليها حظ وناس ليها ترتر..!!
يعنى إيه الموجة الحارة الحالية هاتستمر حتى أغسطس القادم.. هي الناس ناقصة..؟!
واضح إن الحكومة الحالية مش عايزة تجيبها لبر أبدًا..!
إلى وزيرة ثقافة البحرين التي أقيلت من منصبها بسبب رفضها مصافحة سفير إسرائيل بالمنامة:
"خسرت" المنصب.. لكنك "كسبت" حب واحترام ملايين العرب المخلصين لقضايا وطنهم وأمتهم.. وتركت "كرسى" الوزارة لتتربعي على "عرش" قلوبنا جميعا..
صورة رجل الأعمال السعودي الكبير اللي بيبوس إيد ورأس العامل المصري؛ لأنه عمل معه بإخلاص لمدة 40 عاما كاملة.. صورة بمليون مقال عن مدى قوة وعمق العلاقات بين الشعبين المصري والسعودي.. وهي تؤكد أن ما جمعه الله لايفرقه "الشيخ" أبدا..!!
يا جماعة الأخ "إياه"، اللي غاوى منظرة وشهرة، دا مابيقولش فتاوي دا بيعمل دين جديد ملاكي على مزاج حضرته..!
فبعد ما دعا الستات لخلع الحجاب؛ بعد أن قال إنه ليس من الدين فى شىء.. دعا الرجال إلى لبس الذهب لأنه ليس محرما عليهم..!!
يعنى بسلامته عايز الستات تمشي عرايا، والرجالة تلبس دهب و"سيغة" من المعصم للكوع ؛ والدنيا تبقى "آخر مليطة" علشان حضرته ينبسط ويعمر الجمجمة..!!
دا إحنا كدا نبقى فى أزهى عصور.. قوم لوط والعياذ بالله..!!
دا مش ناقص غير إنه يفتى بإن الشمبانيا حلال؛ لأنها "مشروب الفتاة المهذبة".. زي ماقال الممثل خفيف الظل إستيفان روستى..!!
كفاية بقى تحفيل بين الأهلاوية والزملكاوية.. أمال لوكانوا بيلعبوا كورة بجد كنتم عملتم إيه..؟!
دا حتى جدتي، الله يرحمها ويبشبش الطوبة اللي تحت دماغها، قالتها حكمة من زمان: "لا تعايرنى ولا أعايرك.. الهم طايلنى وطايلك"..!
مش عارف ليه كل الزيطة والزمبليطة اللى عاملينها على الأخت بتاعة "الستات اللي مابيعرفوش يكدبوا" ؛ لأنها قالت إنها مابتسمعش القرآن إلا بصوت القارئ الشيخ عبد الباسط....." حمودة "..؟!
فأنا شخصيا ما باأحبش أسمع القرآن إلا بصوت الشيخ القارئ مصطفى إسماعيل.."قمر"، ومن شيخ مشايخ المقارئ المصرية الشيخ محمود خليل.. "الليثى"..!!
نقول إيه..؟! واضح فعلا إن "الستات مابيعرفوش يكدبوا"..!!