أصدق مين وأكدب مين..؟!
أصدق الدكتور رفعت الجمل، مدير المعمل المركزى لبحوث الثروة السمكية، اللى بيقول إن مصر الأولى عالميًا فى إنتاج البورى وإن أسعاره يجب أن تبقى فى متناول الجميع؛ وللّا أكدب الأسعار الفلكية اللى بتؤكد أن البورى أصبح طعام الأغنياء فقط...؟!
أنا شخصيًا مصدق حاجة واحدة فقط سبق أن حذرت منها من أربعين سنة فاتت، فى سلسلة تحقيقات فى مجلة أكتوبر، وهى أن "الحيتان" تلتهم ثروتنا السمكية..
بلا أى هناء أو شفاء..! طبعا أنا قصدى "حيتان" البر؛ اللى قاعدين فى المكاتب المكيفة، مش حيتان البحر..!
ربنا يجعل كلامنا خفيف على "حيتان" البر والبحر..!!
× الحمد لله إن شعبة منتجى البيض نفت ما نشر، منسوبًا لأحد مسئوليها، من أن سعر كرتونة البيض سيصل إلى 120 جنيها خلال أيام.
فإحنا مش هانستحمل "حيتان" للبيض كمان..!
إيه الهرتلة دى..؟!
بصراحة أنا مش عارف إخواننا بتوع "التوك شو" هدفهم إيه وعايزين يوصلوا لإيه بالضبط من "المندبة" اللى ناصبينها يوماتى؛ واللى "بيبشروا" فيها الشعب إن القادم أسوأ.. وإن "تسونامى" الغلا والكوا هايغرق الدنيا كلها ومعها مصر المحروسة..؟!
فهذا الكلام لا يعنى إلا أمرًا واحدًا فقط وهو إشاعة اليأس والإحباط بين الناس..
بصراحة الحكاية زادت وفاضت و"مصخت" على قولة إخواننا الصعايدة..!!
أنتم مال حضراتكم..!
الناس اللى عاملين زيطة وزمبليطة على وسائل التواصل الاجتماعى؛ علشان أستاذة الهندسة اللى قالت إن "تراب جزمة جوزها فوق راسها".. عايز أقول لهم بالمختصر المفيد: أنتم مال حضراتكم؟.. الست حُرة هى وجوزها..يعملوا فى بعض كل اللى هما عاوزينه..!
وهما أحرار فى تحديد المكان اللى يحطوا فيه جزم بعض..؟!
فتحديد شكل العلاقة هو شأن خاص بين الزوجين.. هى شايفاه سى السيد وهى الست أمينة؛ أو هو شايفها الست أم حميدة وهو الريس حنفى اللى مابتنزلش كلمته الأرض أبدًا .. هما أحرار.. فقديما قالوا "من راقب الناس مات كمدا"..
أما جدتى، الله يرحمها، فقد قالتها حكمة من زماااااان: " يا داخل بين البصلة وقشرتها.. ماينوبك إلا...." وبقية المثل كلكم عارفينه طبعًا..!!
كله بيزايد على كله فى حكاية شغل الست فى البيت..!!
فمن يومين طلعت علينا الأخت، بتاعة نشر الثقافة الجنسية، لتؤكد أنه لا يوجد أى سند قانونى لعمل الزوجة فى بيتها.. وبعدها بساعات قام أحد المشايخ بالتعلية عليها مؤكدًا أن الزوج، وليست الزوجة، هو المسئول عن الخدمة فى البيت..!!
مش بعيد بعد كدا يفتوا بإن الزوج، مش الزوجة، هو اللى لازم يحبل ويخلف.. ويرضع ويغير لفف العيال.. هو دا اللى ناقص..!!