تحدث الفنان عمرو يوسف خلال مداخلة هاتفية مع برنامج MBCtrending عن مسلسله الجديد وعد إبليس، والذي يُعرض في الوقت الحالي عبر المنصة الالكترونية "شاهد Vip" ، مؤكدًا إن العمل يناقش قضية إنسانية ولا يُصنف كمسلسل رعب.
وقال عمرو يوسف في تصريحاته التلفزيونية: أنا أعتقد إن موضوع الشيطان رمزي أكتر من كونه الشيطان نفسه، يعني مثلًا لو قولنا إن فيه راجل عليه دين كبير والدين ده ممكن يدخل السجن، هل هيوافق إنه يرتشي؟ في الحالة دي بتكون الرشوة هي الشيطان، طبعًا المسلسل فيه جزء فانتازيا، إحنا مش بنعمل مسلسل رعب ولا أكشن ده مسلسل إنساني بحت.
وأضاف: الجدل مش وحش، والموضوع ده لو كُنا دخلنا في تفاصيل تانية كان ممكن يحصل مشاكل، ولكن موضوع المسلسل إنساني مش بيتكلم عن إبليس، ولكن بيتكلم عن الاختبارات اللي بيتحط فيها الإنسان، لأن دايمًا مفيش حد عارف الاختبار الحقيقي هيجي امتى.
كما تحدث عمرو يوسف عن تفاصيل شخصيته بمسلسل وعد إبليس قائلًا: إبراهيم هو لحم ودم وبيخاف على بيته ومراته والهدية اللي ربنا إدهاله اللي هي الطفل، وكان عايز يمشي في سكة معينة وحصل اللي حصل وخدته في سكة تانية، وتصرفاته كانت غصب عنه ودي أولى عوارض إنه باع روحه للشيطان.
وتابع: شخصيتي بالعمل من الأدوار اللي بتيجي للممثل علشان تستفزه، علشان يحاول يطلع شخصيتين في شخصية واحدة، الحقيقة بذلنا مجهور كبير، وظروف العمل مهيئة للتحضير الجيد جدًا، أنا عملت بروفات كتير أوي، ومخرج العمل من المخرجين اللي بيوجهوا الممثل وبيشتغلوا عليه.
واستطرد: كان ممكن نصور فوق الـ 12 ساعة في مشهد واحد لأن المخرج عايز يوصل لحاجة معينة ومش هيسبني غير لما يوصلها، الحقيقة هو له يد كبيرة في ظهور الشخصية اللي عجبت الجمهور، والشخصية مستفزة وجميلة والحمد لله إني قدرت أقدمها بالشكل اللي عجب الناس ده.
تدور أحداث العمل حول رجل الأعمال شاب ناجح يُدعى إبراهيم، تُصاب زوجته بمرض خطير ليس له علاج، فيلجأ إلى شخص أقنعه بأنه قادر على شفاء زوجته ولكن في المقابل يوقع عقد بيع روحه لإبليس بعد موته، ولكن سرعان ما ينكث إبليس بوعده ليبدأ بتحويل إبراهيم إلى رجل شرير خاضع لسيطرته ويدفعه لتنفيذ أجندته الشيطانية بعد منحه قوى خارقة.
أما عن طاقم العمل يشارك في المسلسل كل من: فتحي عبدالوهاب، عائشة بن أحمد، أحمد مجدي، أحمد الرافعي، محمد يسري، محمد مرزبان، الراحلة مها أبوعوف، خالد كمال، معتز هشام، مراد مكرم، عمرو جمال، و نيللي كريم كضيفة شرف.
كما يشارك في العمل الممثل السعودي يعقوب الفرحان، والنجمة الأمريكية بولا باتن.
والعمل من تأليف توني جوردان الحائز على جائزتي «بافتا» و«إيمي»، ومن إخراج البريطاني كولن تيج الحائز على جائزة «إيمي» ومرش لـ«بافتا»، وكتبه «جوردان» مع انجي لومان فيلد.