قامت الفنانة نشوى مصطفى بمشاركة جمهورها لـ موقف إنساني قام به النجم هشام سليم تجاه الفنانة الراحلة ثريا إبراهيم.
وكتبت نشوى عبر حسابها الرسمي بموقع التواصل الاجتماعي «فيس بوك»: "افتكرت حاجة عن هشام سليم يمكن مش كتير يعرفوها، فى يوم راجعة من التصوير وكان فيه أستاذة ممثلة كبيرة الله يرحمها اسمها ثريا إبراهيم، قالت لى نشوى معندكيش عربية توصلينى فى طريقك لأقرب مكان أنزل أخد تاكسى، قلت لها تاكسى إزاي هوصل حضرتك لباب البيت، وإحنا ماشيين قالت لى عارفة الشقة اللي هتوصلينى ليها دى مين جابهالى، قلت لها مين؟؟ قالت لى شريهان، وحكت لى إنها كانت بتشتغل معاها مسرحية شارع محمد على وكانت بتيجى كل يوم من طنطا للقاهرة وترجع تانى لأن بيتها كان هناك ولما شريهان عرفت قالت لها شوفى الشقة اللي تحبيها وأنا هشتريهالك، ولما اشترتها كانت فرحانة أوى".
وتابعت: "ولما هشام عرف بارك لها وقال لها فرشتيها ولا لسه قالت له فرشتها قال لها كان نفسى افرشهالك قالت له وهى بتهزر طيب ما تعمل حاجة تانية قال لها تحت أمرك، قالت له نفسى أحج، تانى يوم لقت شركة سياحة بتكلمها وبلغتها إن هشام دفع كامل التكلفة وكانت خمسين ألف جنيه وكمان وهى رايحة عطاها مصروف الرحلة وقال لها أدعي لى، بس كده ألف رحمة ونور".
جدير بالذكر أن هشام سليم قد رحل عن عالمنا أمس الخميس، عن عمر ناهز 64 عامًا، بعد صراع مع مرض السرطان.
وكانت آخر أعماله الفنية مسلسل «هجمة مرتدة» في ماراثون رمضان 2021 بجانب أحمد عز، وقبله مسلسل «كلبش 2» بجانب أمير كرارة.