حنان فريد الديب تروي كواليس الأيام الأخيرة في حياة والدها

كشفت حنان فريد الديب ابنة المحامي الراحل فريد الديب، كواليس بشأن الأيام الأخيرة في حياة والدها.

وقالت خلال لقائها ببرنامج "مساء دي إم سي" الذي تقدمه الإعلامية إيمان الحصري بقناة "دي إم سي": "يوم 3 سبتمبر قبل وفاته نزل المحكمة وكان عنده قضية وكان تعبان وقتها وكان رايح على كرسي، ولما جاء وقت المرافعة وقف أمام المحكمة واترافع وهو واقف على قدميه، ويومها زعل لأنه حس إنه جسمانيًّا مش قادر، ولكن واعٍ ذهنيًّا وعقليًّا لحد آخر وقت من عمره".

وأضافت: "أختي إيمان الله يرحمها كانت تقول لي أبوكِ يوم ما هيحط القلم يوم ما هيحط راسه".

ولفتت: "والدي كان بيحضرني أنا وإيمان أختي ليوم وفاته، وكان بيقول لنا أنا هموت ولازم تاخدي بالك من نفسك، وإن دا أمر الله ولازم هينفذ".

وأشارت: "والدي كان دخل المستشفى علشان يعمل عملية بذل من الرئة، وهو كان يعاني من سرطان الدم، وفجأة تعب جدًّا وفي آخر يوم له جابني، وقال لي أنا بموت وعارف إني بموت ودِّيني أموت في البيت.. أنا مش هموت هنا في المستشفى.. أنا طبعًا قعدت أعيط وأقول له: لأ ما تقولش كدا، وما تسبنيش، فطبطب عليَّ وقال لي: أمر الله، فأطعته وأخدته للبيت، وفعلًا مات في البيت زي ما هو عايز".