قال الفنان محمد رياض: "لما رُحت اتقدم لمراتي رانيا محمود ياسين في سنة 1996، قابلت الفنان الراحل محمود ياسين والوضع كان مربك بالنسبة لي لأنه عنده هيبة ربانية بهيئته وصوته، واتلغبطت في الأول فقال لي أنت عايز إيه يعني".
وأضاف خلال لقائه ببرنامج “معكم” الذي تقدمه الإعلامية منى الشاذلي بقناة “سي بي سي”: " محمود ياسين كان أرق إنسان ممكن الواحد يقابله في حياته وهو كان عارف إن إمكانياتي المادية متواضعة لكنه قدر كل شيء ولم يحملني شيء وما فرضش عليَّ حاجة وكان ليه شرط واحد كان نفسه أقعد معاهم في نفس الفيلا بس أنا رفضت وقلت له أنا اسف عايز أسكن في بيتي، وما كلمنيش في مهر ولا قايمة ولا هتجيب شبكة بكام".
ولفت: "الفنان محمود ياسين شاف إني إنسان ممكن أحافظ على بنته وأقدر أتحمل مسؤولية الزواج فشاف فيَّ الحتة دي ووافق بيَّ، اللي يتقدم لبنته حد يتوسم فيه خير يسهل له الزواج".
وتابع: "أنا كنت بشتغل مدرس كيمياء بعد لما اتخرجت من الكلية، واخترعت حاجات باسمي وكنت بحب الكيمياء جدًّا وعملت حاجات صعبة جدا باسمي، ومركبات لها علاقة بحفظ الأكل، وأنا كنت لسه متخرج من كلية العلوم وكنت بشتغل في معمل تحاليل طبية وفيه مدرسة ثانوي بنات كنت بروحها 3 أيام في الاسبوع وكان عندي 22 سنة وبعدين مدير المدرسة قال لي ما تحضرش طابور المدرسة فبقيت أروح على الحصة، وبعدين قال لي أنت إنسان كويس ومدرس هايل ومفيش أي غبار عليك في أي شيء بس مش هينفع تكمل معانا لإن عندي بنات صغيرين وما قدرش أحط الزيت جنب النار ورفدوني من المدرسة وأنا كنت حريص جدًّا".