وجه الإعلامي عمرو أديب رسالة لمحمد صلاح، لاعب نادي ليفربول الإنجليزي، بعد الانتقادات التي وجهت له بسبب عدم دعمه للشعب الفلسطيني.
وقال أديب خلال برنامج "الحكاية" المذاع على قناة MBC مصر: "عايز أطمنك أنه إلى حد ما لو تقارن الإعلام الإنجليزي بأي اعلام أوروبي آخر فهناك قدر من التوازن إلي حد ما يعني اللي بيتفرج على الـBBC هيشوف بعض التوازن فأنت يا محمد في مجتمع فيه عدد كبير من العرب والمسلمين وطبعا بيتكلموا أنه تم تحذير النني بعد ما قال إنه مؤيد بس إحنا محتاجين كلمتك يا محمد".
وأضاف: "حد هيقولي يعني هو محمد صلاح هو اللي هيوقف الضرب على غزة، لا بس الشباب منتظرين اللي مثلهم الأعلى فخر العرب، ينتظر الكبار للعون والنجدة محمد هذا هو وقت الكلام، تحدث حتى نراك، أنا اعلم اللي جواك متخفش كلنا معاك وموهبتك وقدرتك هتخليك تقدر تعبر هذا الأمر إحنا مستنيينك".
وتابع "وانا بقول للناس اللي بيهاجموه بشويش شوية ما هو في أندية مفتحتش بقها وكتير فيعني بشويش عليه وأنا واثق أن ربنا هيهديه للقرار الصحيح".
يشار إلي أن الإعلامي محمد علي خير دافع عن محمد صلاح في منشور له قال فيه: "بلاش مزايدة على محمد صلاح هو لاعب كرة قدم مش أمين جامعة الدول العربية".
وكان محمد صلاح قد تعرض لعدد من الانتقادات على منصات التواصل الاجتماعي بسبب عدم الإعلان عن موقفه تجاه الأحداث الجارية في فلسطين.