مش عارف ليه كلما تابعت الأحداث الراهنة والمواقف العلنية، واللى "تحت الترابيزة" للدول الصديقة والشقيقة أدعو بعلو الصوت: اللهم احفظ مصر وشعب مصر وجيش مصر.. اللهم احمنى من أشقائى.. أيوه أشقائى.. أما أعدائى فأنا كفيل بهم..؟!
إما إنه عبيط أو بيستعبط..!!
فوزير الخارجية الأمريكى "بلينكن" نفى تماما، مقسما براس جده الحادى عشر، أن يكون هدف حاملات الطائرات الأمريكية استفزاز دول المنطقة أو أى غرض بطال.. لاسمح الله..!!
أنا شخصيا ومن غير أى حلفان مصدق الراجل.. فحاملات الطائرات الأمريكية والبريطانية جايين يقضوا "الفاكانس" بتاعهم فى المنطقة؛ وبالمرة يلعبوا "عشرة طاولة محبوسة" مع دول المنطقة ويشربوا معاهم حجرين شيشة تفاح مع كوبايتين حلبة حصى..!!
حد فكيك هايقول لى بس بلينكن من أول يوم وهو بيؤكد ضرورة استمرار الحرب وإن الحاملات الأمريكية موجودة تحت أمر إسرائيل وهدفها ضمان انتصارها فى الحرب..؟!!
طبعا ها أرد عليه وأقول له: اللى قال كدا مش بلينكن، والعياذ بالله، دا أخوه التوأم اللى عايش فى المكسيك وهو أخ شرانى بيحب الحرب والدم والدمار وقتل المدنيين زى عينيه..!!
يا جماعة كفاية عبط بقى.. فضوها سيرة.. إنتم عرايا "بلابيص" أمامنا وأمام العالم كله..
وألف رحمة ونور على قيم الخير والحق والعدل.. والإنسانية..!!
العالم الغربى كله عنده إما حول أو عمى حيثى والعياذ بالله.. يكيلون بمكيالين.. ويسمون جرائم الحرب التى ترتكبها إسرائيل، والإبادة الجماعية للشعب الفلسطينى "دفاعا عن النفس"..!
فكرونى بالأحول اللى دخل مطعم فساب طبقه وأكل طبق اللى جنبه..!
وزير خارجية الصهاينة عنده كل الحق فى مطالبة سكرتير عام الأمم المتحدة بالاستقالة؛ لأنه قال كلمة حق ضد ما ترتكبه إسرائيل من مجازر وجرائم حرب وانتهاكات لحقوق الإنسان فى فلسطين..!!
فمن المعروف أن وزير خارجية الصهاينة وارث الأمم المتحدة عن الست والدته.. وبالأمارة مسجلها فى الشهر العقارى بتاع اللى خلفوه..!!
هى حاجة من اتنين: إما إن "الحاج أبو نسمة"، ساكن البيت الأبيض، مش دارى باللى بيحصل حواليه.. واللى يقوله دلوقت ينفوه بعد دقيقة.. أو إنه ياولداه عنده شعرة زى خالتى شفيقة.. ساعة تروح وساعة تيجى.. ساعة تروح وساعة تيجى.. هييييييه.. راااااااااحت..!