آخر كلام

الإعلام الأمريكي قايم قيامة يا حرااااام علي الراجل الطيب الحاج أبو نسمة؛ اللي لا بيهش

ولا بينش.. قال إيه..؟! لأنه عايش في عالم تاني ومالوش علاقة بالواقع.
فهو بينسي علي طول هو رايح فين وجاي منين..؟
حرام عليكم.. دا الراجل قايد صوابعه شمع للشعب الأمريكي.. ومشغول ليل نهار بعمل محادثات علي أعلي المستويات.. مع الأموات.. أي والله مع الأموات..!!
وآخر محادثات عملها مع الرئيس الفرنسي فرنسوا ميتران اللي مات وشبع موت من 28 سنة بالتمام والكمال..!
وفوق ده وده.. أبو نسمة عمال يغيّر طول اليوم في خريطة العالم.. فمصر بقي اسمها المكسيك..
وأوروبا بقت علي شمال كوبري القبة.. والصحراء الغربية بقت بعد الريست هاوس بشوية.. زي ما قالت المطربة شادية بالضبط..!
ياريت الإعلام الأمريكي يسيب الحاج أبو نسمة
في حاله.. فاللي فيه مكفيه.. ربنا يشفيه..!

اللي غايظني وحارق دمي كمية الناس اللي لسه بتحتفل بعيد الحب وهاتك يا ورد ودباديب حمرا
وهم مايتلم..!
يعني الحكومة مشلوحانة، وما تسألونيش يعني إيه مشلوحانة، ورافعة أسعار الكهربا والمية والغاز والبنزين حتي تذكرة دخول الجناين العامة خلوها بعشرين جنيه؛ ولما تسأل الموظف عن السبب يقول لك بكل نطاعة كل سنة وإنت طيب.. "هابي فلانتاين داي" بقي يا باشا..!
تدخل السوبر ماركت من دول وكأنك دخلت نار جهنم، والعياذ بالله، كل شيء وأي شيء حتي أسعار المش والجعضيض بترتفع كل ساعة مش كل يوم؛ لكن التاجر الفاجر مش ناسي أبدًا عيد الحب.. فحاطط لنا علي الباب عامل غلبان لابس دبدوب بيوزع ورد بمناسبة "الفلانطاين"..!
يخرب بيت كدا.. حكومة مالهاش كتالوج وتجار هايروحوا النار.. قرفتونا..!
عمومًا الست أم كلثوم.. قالتها حكمة من زمان:
"حب إيه اللي أنت جاي تقول عليه، إنت عارف قبله معني الحب إيه"..!

يا جماعة كفاية تحفيل وهري ولت وعجن في موضوع تولي حسام حسن تدريب المنتخب.
فأنا شخصيًا شايف إن منظومة الكورة كلها علي بعضها بايظة؛ ولابد من إصلاحها بالجملة مش بالقطاعي..!
فالمنظومة كلها عبارة عن أعمي بيقود أعرجا..
لا مؤاخذة..!

آخر نكتة ..!
مطربة إسرائيلية، درجة عاشرة، عملت أغنية؛ علي وزن ولحن أغنية بنت السلطان بتاعة أحمد عدوية، بتهدد فيها يحيي السنوار قائد حماس بالقتل..!
هو دا الكلام.. فمن الواضح إن السنوار ما بيجيش غير بالعين الحمرا..!