دا راجل مفتري بصحيح..!
فمدرس الجيولوجيا اللي عمل درس خصوصي في إستاد رياضي عيني عينك؛ أثبت بالدليل القاطع والبرهان الساطع إنه راجل جبروت؛ وإن كل أجهزة الدولة بوزارتها ومؤسساتها وهيئاتها وسلطاتها وبابا غنوجها بعافية حبتين..!
فالرجل تحدي الكل عيني عينك تحت شعار" إحنا هنا..لاحكومة بتهمنا ولاسجن بيلمنا"..!
بالمناسبة..قبل أن تحاكموا ذلك الرجل عليكم أولا أن تحاكموا العشرات قبلهفي وزارات التعليم والرياضة والأمن ؛ مرة لإنهم إتفقوا بليل "من تحت الترابيزة" لتسهيل إرتكابه لجريمته ..!
وحاكموهم مرة أخري لإنهم سبب الحالة المتردية والفوضي السائدة في مجالات التعليم والرياضة والأمن ؛ والتي سمحت لشخص مغامر بأن يفعل مافعله تحت سمع وبصر الجميع دون أن يحرك أي أحد ساكنا..!
أنا علي يقين من أن أحدا لن يحاسب أحدا.. لكنني أقولها من باب تبرئة الذمة لا أكثر.. ألا قد بلغت..اللهم فأشهد.
الناس هاتك ياتريقة و"نأوذة".. علي الساحل الشرير اللي وصل فيه إيجار الليلة الواحدة إلي 750 ألف جنيه..!
يا جماعة الخير إهدوا شوية علي نفسكم.. فإذا عرف السبب بطل العجب..!
فإللي بيأجر ليلة واحدة بالمبلغ ده بياخد شهادتين مهمين جدا مختومين بختم النسر:
الشهادة الأولي بتؤكد إن المستأجر مغفور له ما تقدم من ذنبه وما تأخر؛ حتي ولو كانت ذنوبه مثل زبد البحر..!!
أما الشهادة التانية فهي بتدي المستأجر الحق في دخول الجنة بلا حساب ولاسابقة عذاب..!!
آه يا دماغي..!
قول ياترعة المفهومية يافيلسوف الحمير..!
ف "اللوز" فايز الدويري ؛ الذي تسوقه لنا قناة الجزيرة ، بوصفه "خابور" إستراتيجي ماولدتوش ولادة ؛ لاهم له إلا الهجوم علي مصر وجيش مصر ؛ وتلقيح الكلام ،كالنسوان، عليها وعلي جيشها البطل.
فمن الواضح أن هذا "الخابور" يلعب دورا مشبوها لتشويه دور مصر المهم في المنطقة..
أموت وأعرف هو جاب خبرته العسكرية والإستراتيجية اللوذعية منين..؟!
فمن الواضح إنه لم يدخل معركة حقيقية واحدة في حياته ؛ بل إنني أشك أصلا إنه دخل الجيش..دا بالكتير شافه فيديو في بيت الست خالته..!
يا جماعة سيبكوا بقي من الهري والكلام الفاضي عن قطع الكهربا و ارتفاع أسعار الفراخ واللحمة والهم اللي ما يتلم؛ وخلونا في المهم.. هو " الهضبة " ضرب المعجب بالقلم علي وشه ؛ ولا وش المعجب هو اللي ضرب إيد الهضبة..؟!
دا سؤال مهم جدا مش بعيد يجيبوه في إمتحانات "السنوية العميا" السنة دي..!
منتخب وطني إيه اللي عايزينه ينافس ويجيب لنا كاس العالم لكرة القدم..؟!
دا المنتخب دا مايعرفش يجيب لنا إلا الضغط والسكر..وحرقة الدم.؟!