كشف أحمد سالم المتحدث الرسمي باسم نادي الزمالك، تفاصيل جديدة حول ما دفع الفارس الأبيض إصدار بيانًا أعلن فيه عدم خوض مباراة الأهلي في الدوري المصري الممتاز.
وقال أحمد سالم في تصريحات تليفزيونية: من أول دقيقة واحنا متمسكين بقرارنا ودا مش نوع تعدي ولا استفزاز ولما يترد علينا ردود واقعية نبقى نعيد التفكير والنظر، لكن الردود اللي جاتلنا ملهاش علاقة بأسئلتنا.
وأضاف: كل الجلسات التي انعقدت لم ترد على مطالب الزمالك، والردود كانت غير منطقية للغاية.
وأكد أحمد سالم خلال تصريحاته: نشعر بالحزن على عدم خوض المباراة أمام الأهلي والمباريات دي الجماهير بتستناها وكان نفسنا نلعب، لكن الوضع العام من التنظيم والتحكيم مكنش يبسط، ولما تلاقي لجنة الحكام بتعين نفس الحكام اللي عملوا أخطاء، وأن الحكام دي بتحكم تاني يبقا دا مش طبيعي، وحتى إجابات الرابطة ملهاش علاقة بالأسئلة بتاعتنا وثروت سويلم تجاوز في حق الزمالك ورجع مرة تانية بعد ما اعتذر، بدون ما يدي إجابات مقنعة على مطالب الزمالك.
وعن لعب المباريات المقبلة بالدوري المصري، كشف المتحدث الرسمي: نعدي بكرة بس وبعدين مجلس الإدارة يجتمع ونشوف هنلعب الماتشات اللي الجاية ولا لاء، ورد الزمالك خلال ساعات أو أيام قليلة سوف يتم إعلانه، وعشان تحصل على حقوقك ساعات بيبقى عندك خسائر وانت بتبقى عارفها والإدارة شايفة أنها في الفرصة دي تعرّف الناس مساوئ المنظومة، ولو هيجيب لنا شوية خسائر مفيش مشكلة.
وأردف: مفيش خلاف مع جهة معينة بل مع المنظومة وطريقة الإدارة وجدول المباريات ولجنة المسابقات التي لا يعلم أحد من هم أعضائها، وأسئلة كتير بتتطرح ومفيش رد عليها.
وعن الدخول في معسكر مغلق لـ مباراة الأهلي، أشار أحمد سالم المتحدث الرسمي للزمالك: مكنش فيه استعداد للمباراة وكلها اجتهادات صحفية، ولم يتم الاستجابة لمطالبنا فلذلك استقرينا على موقفنا.
وأوضح: احنا معندناش ظروف خاصة لأن الترجي والنصر وصن داونز والهلال والاتحاد بيلعبوا زي الأهلي عندنا، فاحنا معندناش ظروف خاصة ولا الدوري المصري حالة منفردة يعني.
واستمر أحمد سالم في حديثه: مباراة المصري هي السبب الرئيسي في مشكلة القمة، وهل مطلوب من الزمالك افتراض حسن النية وخسارة النقاط؟، أنا ممكن أكون تجاوزت عن خطأ مباراة المقاولون لكن لما يتكرر خطأ تاني هفترض حسن النية لحد امتى؟، ولما أخد موقف بعد مرة واتنين وتلاتة دي حاجة مش ضدنا.
وأتم تصريحاته قائلًا: اللي فشل في مجال مش طبيعي إني هجيبه السنة الجاية هو هو، وأي حد فشل في أداء مهمته لازم يرحل، ومعندناش مشكلة مع أشخاص ومش بنطالب بإقالة فلان قد ما بنطالب بتطوير المنظومة، وعادة الجمهور بينقسم على أي قناعة وهذه المرة الجمهور اجتمع أن الكرامة أهم من أي حاجة.