مذيعة من بتوع إعلام "ما قال لى وقلت له ياعوازل فلفلوا" بتقول، لافض فوها وعاش حاسدوها، إن الحكومة ميت فل وعشرة وإنه ليس على راسها بطحة بسبب زيادة مدة قطع الكهرباء لثلاث ساعات.. خاصة وإن الناس آخر انبساط وزبادى فى الخلاط..!
عايز أرد عليها بس أنا راجل محترم وماتخرجش منى العيبة أبدا.. وكمان العضمة كبرت وأنا مش حمل جرجرة للمحاكم بتهمة السب والقذف..!
أنا مش مصدق يا إخواننا اللى بيتقال عن الأخ "نقصان" وإنه ساب مركز "تخوين"؛ اللى هايعلم المسلمين صحيح الدين، بسبب الفلوس اللى مع التيوس..!!
يا جماعة.. الأخ "نقصان" دا مفكر كبير "صاحب رسالة".. إزاى يختلف مع أخيه المفكر الكبير "أبو حمالة".. حمالة الأسية، حول الفلوس ومين اللى يقبض المعلوم ويوقع على الشيكات والتبرعات والتحويلات والبلح الأمهات..!!
دى أكيد وزة شيطان..!!
ياريت الأخت "بطة" والأخ "كفران" يتدخلوا بسرعة للصلح بين نقصان وأخيه فلتان؛ حتى لا ينهار مركز "تخوين" اللى هايعلم المسلمين صحيح الدين.. وتروح السبوبة فى خبر كان..!!
أتمنى من الله ولا يكتر على الله أن تكون المعركة الدبلوماسية الحامية الوطيس الناشبة الآن بين البيت الأبيض و"النتن ياهو" حول إمداد إسرائيل بالأسلحة معركة حقيقية؛ وليست مجرد عركة "فشنك" بين مصارين البطن اللى بتتخانق..!
عمومًا ليس أمامنا كعرب مكسورى الجناح.. متفرجين ولسنا فاعلين.. إلا أن نضع طوبة على طوبة حتى تظل العركة منصوبة..!!
بالمناسبة.. لقد حذرت فى كتابى "الاقتصاد وسنينه"، وهو أول كتاب اقتصادى ساخر فى المكتبة العربية، من أن يصبح "الشاى أبو ياسمين" هو شعار المرحلة فى مصالحنا الحكومية..!
فالبعض يعطل المراكب السايرة بحجة أن القانون أو اللوائح والأوامر لا تسمح.. لكنها تسمح فجأة، وبقدرة قادر؛ بعد ما يشرب الشاى أبو ياسمين..!
لقد كنا نعتقد أن تلك الظاهرة الإجرامية كانت موضة وبطلت عندما كانوا يرفعون شعار "إذا أردت أن تنجز فعليك بالوينجز".. لكن واضح أنها عادت وبقوة.. وعينى عينك.. بمنتهى السفور والفجور.. تحت شعار "شخلل علشان تعدى"..!
ربنا يحرق كل فاسد يستغل وظيفته بجاز وسخ.
طبعا من حق ممثلة الإغراء "إياها" إنها تنتقد التعليم واللى بيتعلموه واللى جابوه..!
فهى بسم الله ما شاء الله مربية فاضلة.. ومربية أجيال وياما اتخرج من تحت إيدها أجيال وأجيال.. اتعلموا من أفلامها الحكمة والموعظة الحسنة..!!
سامحنى يارب..!