مسئول الآثار اللي "قرر" إنهم يضربوا شاكوش وأزميل في حجارة الهرم الأكبر في عز الضهر أمام السياح لمد كابل كهرباء لابد أن يحاكم بتهمة.. "العبط"..!
فهذا المسئول أساء لسمعة مصر وعمل أسوأ دعاية للسياحة وللآثار..!
المفارقة هنا إن هذا المسئول "العبقري" مسح بأستيكة حملة الدعاية العالمية المجانية ل مصر وآثار مصر اللي عملها " كلب بلدي".. منذ عدة أسابيع بعدما "قرر" صعود أعلي قمة الهرم والتربع عليها..!
مش عارف ليه الحكومة شاربة مية باردة وعاملة نفسها من بنها وودن من طين وودن من عجين تجاه "الدور الرذل"
اللي ماشي اليومين دول في البلد..؟!
فالدور كوكتيل من البرد والأنفلونزا والكورونا.. صداع قاتل.. واحتقان في الزور.. وبلغم.. ودوخة.. ورشح.. وفقدان لحاسة الشم.
ياريت الحكومة تعمل "كونسولتو حُكما" تشوف لنا إيه حكاية "الدور الرذل" اللي ماشي اليومين دول في البلد.. وهل هو عودة قوية لل كورونا من جديد.. أم فيروس متحور منها.. أم أنه وباء جديد خالص..؟!
ولا بد للحكومة من أن تبحث مدي الحاجة للجوء للعودة للإجراءات الإحترازية في المدارس والجامعات ووحدات الإنتاج وباقي التجمعات؛ فالمسألة خطيرة فعلا لأن دا مش دور برد عادي من بتاع زمان..ولا أنفلونزا من اللي كلنا عارفينها..
دي حاجة تانية خالص.. حاجة "أشرس من رامبو وأقوي من سانجام"..!
ربنا يستر.
نقول تور يقولوا احلبوه..!
قلت لصديقي الطبيب : أنا شاكك إن الدور اللي عندي دا كورونا .. فالأعراض هي هي.. أعــراض كورونــا بعينها وغباوتها.. ووشها العكر..!
قال لي علي الفور: مفيش حاجة دلوقت اسمها كورونا.. دي أنفلونزا.. وعلاجها هو نفس علاج الأنفلونزا.. مضاد حيوي..خافض للحرارة.. حبيتين للصداع.. وكله ها يبقي تمام التمام
وعال العال..!
حاولت عبثا أن أثبت له وجهة نظري لكن دون جدوي.. وقلت له إنني تناولت كل أدوية الأنفلونزا لكن دون أي نتيجة.. فأصر علي رأيه.. فلا وجود الآن لل كورونا ولا أخواتها..!!
مش عارف ليه افتكرت فجأة نكتة الراجل اللي قالوا له مراتك بتخونك مع الكهربائي..!
فرد عليهم بكل استهزاء قائلا: أستغفر اللة العظيم.. يا جماعة اتقوا الله.. أنتو عندكو ولايا.. دا لا كهربائي ولابيفهم
في الكهربا..!