والله العظيم عيب وحرام اللي بتعمله شركات الأدوية في الشعب.. فهي قد دأبت علي إخفاء معظم الأدوية ، إن لم يكن كلها، مرة واتنين وتلاتة.. وفي كل مرة ترفع أسعارها للضعف..!
حدث هذا ويحدث حتي الآن مع كل الأدوية خاصة المضادات الحيوية والمسكنات و الأدوية الملينة والفوارة وغيرها وغيرها.
كل ده و الحكومة بتتفرج وعاملة نفسها من بنها.. ولا أتجاوز إن قلت بل إن كل ذلك يتم بمباركة وزارة الصحة وأجهزتها المسئولة عن تسعير الدواء..!
إن ما يحدث جريمة احتكار واحتقار وفساد بختم النسر.. وعيب أن يفلت مرتكبوها من أي حساب أو عقاب.. أو حتي عتاب..!
الدكتور "نقصان" أبو لسان فلتان، اللي لسانه أطول من محور روض الفرج، بيقول إنه لما عملوا سبوبة "تخوين"، للتشكيك في ثوابت الدين، واجهوا هجومًا شرسًا ونباحًا من "كلاب السكك"..!!
وقال إنها اكتشفت إن شريكه "الأنتيم" في السبوبة كان لعنة وطلع أدني من الحد الأدني.. ولعن سلسفيل جدوده.. وكان ناقص يشتمه بالأم والأب..!
يعني من الآخر بسلامته هاجم بعضمة لسانه تخوين واللي عملوا تخوين.. وانضم من حيث لا يدري لزمرة "كلاب السكك" اللي بتهو هو.. حسب وصفه..!
عموما لا أجد ما أقوله للدكتور "نقصان أبو لسان فلتان "إلا ما قاله الشاعر الفطحل الأسطي "ستاموني": قالوا لي ليه تعشق قفا.. وتسيب قلوب فيها الدفا.. قلت لهم قلبي اللي انكفي..؟!!
آه يا قفا.. آه يا قفا..!!
الحاج أبو حنان ، ضرب المثل والقدوة في حرية الرأي والتعبير؛ بعد ما منع أكبر وكالة أنباء عالمية من تغطية أخبار البيت الأبيض ، اللي عمره ما بينفع في اليوم الأسود؛ لمجرد أنها خالفته في الرأي..!!
ففخامته بيقول خليج أمريكا مش خليج المكسيك ؛ والوكالة بترفض؛ لأنها متقدرش تغير في التاريخ ولا في الجغرافيا..!
طبعا الكلام ده معناه إن فخامته مؤمن بحرية التعبير لكن علي طريقة الست "أم عبير" أم لسان طويل.. والست أم "لالو" بتاعة حلّلو ياحلّلو..!!
الدمعة كانت هتفر من عيني بعد تهديد المذيع "إياه" بأنه لن يشجع الأهلي بسبب إعلان أبو تريكة..!
ليه بس كده يا أستاذ..؟! ده الملايين كلها بتحبك لأنك عمرك ما بتطبل؛ وبتسمع نصايحك وبتعمل بيها.. خاصة نصيحة حضرتك بأكل "رجلين" الفراخ لأنها ألذ..ألذ..؟!!
أرجوك ارجع عن قرارك؛ لأنك بكده حكمت علي الأهلي بالإعدام.. ومسحت اسمه من التاريخ بأستيكة وشردت جماهيره ولاعبيه..وأصبحوا كالأيتام علي موائد اللئام..!
آآآآآآآآآه.. يا قلبي يا كتاكت.. ياما أنت شايل وساكت..!!