سؤال بريء جدًا جدًا: هو فين موقف مجلس "النوام".. آسف قصدي مجلس النواب بغرفتيه.. مما تواجهه مصر الآن من تحديات إقليمية ودولية..؟!
لماذا لا يعلن بوضوح، باعتباره ممثلا للشعب المصري من أسوان لراس التين، عن دعمه لقضايانا المصيرية؛ ووقوفه خلف قيادتنا الحكيمة وخلف جيشنا العظيم، في هذه الظروف العصيبة، ضد ما يحاك لنا من مؤامرات ومخططات مجنونة تستهدف وتهدد أمننا القومي وسيادتنا علي أرضنا..؟!
لماذا لا يتحرك لشرح رؤية مصر في المحافل الدولية وبرلمانات العالم.. والتأكيد علي مواقفنا الثابتة تجاه قضايانا المصيرية وقضايا أمتنا العربية..؟!
سامحوني إذا كنت قد أزعجت المجلس الموقر بأسئلتي الساذجة.. وأقلقت منامهم وراحتهم خاصة في هذا الشهر الفضيل.. كل عام وأنتم بخير.. ويجعله عامر..!
أهلي إيه و زمالك إيه وكرة قدم إيه اللي عايزين تفتتوا الجبهة الداخلية بسببها..؟!
يا جماعة اختشوا.. الظرف صعب..والتحديات خطيرة.. والكل يتربص بنا وبأمننا القومي.. والعدو علي حدودنا.. وإنتم بتتكلموا عن ال أهلي وال زمالك والتلات نقاط من حق مين..؟!
أمال لو بتلعبوا كورة قدم حقيقية كنتم هاتعملوا فينا إيه..؟!
ياريت الحكومة تتدخل لفض هذا المولد العبيط.. لامؤاخذة.. لأن البلد مش ناقصة تفتيت وتشتيت..!
علي فكرة شتيمة العبد لله حرام في رمضان..!
نصيحة لوجه الله للشيخ إياه بتاع يا "زينبو": سايق عليك النبي ارجع لأصلك وسيبك من الكلام الفاضي اللي لا بيودي ولا بيجيب اللي بتعمله دلوقت..؟!
إنت مالك ومال الفن والفنانين.. دا توب مش توبك أبدًا.
الناس كانت مستحملاك بالعافية وأنت بتستخف دمك وبتقول يا زينبو.. ويا بت أنت حد مسلطك عليا.. وإضربيه يا بت.. وحرام وحرامين وتلات حرامات.. إلي آخر تلك اللطافة والظرافة وخفة الدم اللي تلطش.. قصدي اللي تدهش..!
لكن أن تصل الحكاية لشاكوش اللي بتسأله: "إنت شفت كعب البنت المحني فين"..؟! ولبنت ملك الترسو اللي بتسألها: إنت جبتي الحلاوة دي منين.. فدا كتير..كتير قوي.. أوفر..!
حضرتك بكدا عملت زي الغراب اللي عايز يبقي طاووس.. فلا بقي طاووس ولا رجع غراب زي ما كان.. بقي حاجة جدًا صايصة ومايصة.. لامؤاخذة..!
ولا حول ولا قوة إلا بالله.
هو إحنا مش هانخلص بقي من المسلسل الهابط والحدوتة البايخة بتاعة زواج وطلاق الأختين الحلوين هناء وشيرين..؟!
يا جماعة ارحمونا بقي.. المرارة اتفقعت والأستبن بالشيء الفلاني.. وكل اللي في السوق تايواني مضروب..؟!
الرحمة حلوة..!!