إيه الخيبة اللي بالويبة دي..!
خلاص انتهت كل مشاكلنا المتلتلة ولم يبق إلا عودة الألقاب.. الباشا والبيه والأفندي..!!
اختشوا عيب.. الناس مش ناقصة استفزاز..!
بعد رفع أسعار الوقود والبنزين وبوتاجاز الغلابة اللي بقي بـ 200جنيه.. عيب قوي إننا نقول إن الحكومة بتلعب في عداد عمرها..عيب وألف عيب..!!
فمن سنين كتير فاتوا أنا قلت، في نفس المكان، وبعلو الصوت إن الحكومة الحالية انتهي عمرها الافتراضي من زماااااان..!!
اللي غايظني إن المحافظين بيحذروا السواقين من رفع تسعيرة ركوب الميكروباص بعد زيادة أسعار البنزين ..!
طب عيني في عينكم كدا..!
بصراحة أنا مبسوط من الحرب التجارية اللي شغالة اليومين دول بين أمريكا و الصين ودول أوروبا.. وشايف إنها لصالح مصر..
فهذه الحرب فرصة لزيادة الصادرات المصرية لكل الأسواق بلا استثناء.
كما أن هذه الحرب قد تدفع المستثمرين الغربيين والصينيين للبحث عن أسواق، لم تتأثر بهذه الحرب، للاستثمار فيها؛ بل ونقل صناعات كاملة بربطة المعلم إليها..
وأعتقد أن مصر من الدول المرشحة لذلك؛ لأنها بعيدة تمامًا عن هذه الحرب؛ وبها كل المقومات التي قد تغري المستثمرين.
لذلك كله أتمني أن تشتعل الحرب كمان وكمان.
وطوبة علي طوبة خللي العاركة منصوبة..!
مصرفيون كبار، منهم رؤساء بنوك حاليون ونواب سابقون لمحافظ البنك، تعجبوا مما كتبته عن الرسوم المبالغ فيها لبنك الإسكان والتعمير والتي وصلت إلي 95% من قيمة الحساب البنكي..!!
وزاد عجبهم عندما علموا أن البنك يحصل علي رسوم 230 جنيها نظير إغلاق الحساب..وكأنهم هايقفلوا مضيق باب المندب..!
وأكدوا لي إن ما يفعله البنك هو ضد كل ما يسعي البنك المركزي لتحقيقه من أهداف خاصة الشمول المالي .. وقال بعضهم حاجات كتير لن أفصح عنها حتي لا يغضب المصرفي الكبير باسل الحيني رئيس البنك..!
سؤالي الساذج للبنك المركزي: هو بنك الإسكان دا مالوش صاحب..؟!
التقرير الذي صدر عن اللجنة التي فحصت سيرك طنطا بعد أن التهم نمر دراع عامل.. تقرير يفطس من الضحك..!
فالتقرير بيؤكد إن كل الحيوانات هادية وبنت حلال، وكل حيوان بيتصرف له يوميًا ما بين 8 إلي 10 فرخات طازة دبح اليوم وأربع بيضات ولترين لبن حليب من خير بلدنا..!!
التقرير نسي يقول إن الحيوانات بيفطروا تشيز كيك وبيض مدحرج بالزبدة.. وبيتغدوا سوشي وإسكالوب بانيه..!
آه يا دماغي.. واضح إن كل كلمة في التقرير بتؤكد إن اللجنة، هي اللي "بتاكل" كويس مش حيوانات السيرك..!