كلمة رئيس مصر فى قمة الدوحة هى أقوى رد على العربدة الصهيونية؛ وهى إنذار أخير لمجرم الحرب أبو رخصة "النتن" اللى عاوز يولع المنطقة؛ ولا أبالغ إن قلت بل والعالم كله..
"النتن" ماشى بسرعة الصاروخ نحو الحرب الشاملة فى المنطقة؛ ومحاولة تصفية الشعب الفلسطينى.. ولا أحد فى العالم كله عاوز يلمه.. بل كل جرائمه تحت رعاية ساكن البيت الأبيض اللى عمره ما بينفع فى اليوم الأسود..!!
نصيحتى للدكتور مصطفى مدبولى رئيس الوزراء: كفاية رفع أسعار؛ وزيادة معاناة الشعب ؛ فالظروف لا تحتمل .. وولاد الأبالسة وكلاب السكك واكلين ودان الشعب شائعات وأكاذيب وتشكيك فى كل حاجة وفى أى حاجة..!
أهم هدف يجب أن تركز عليه الحكومة الآن هو تعبئة الجبهة الداخلية خلف قيادتنا الوطنية وجيشنا البطل.
وبعدين ياحكومتنا الرشيدة الرحمة حلوة.. هو كله ضرب ضرب.. مفيش شتيمة..؟!
بعد سرقة إسورة أثرية من المتحف المصرى وقف موظف غلبان يصرخ فى ميدان العتبة اللى بيسرقوا فيه الكحل من العين: والله العظيم حرام يسرقوا محفظتى فى عز الضهر .. دا أحنا بقينا زى اللى واقفين فى المتحف المصرى..!!
مش عارف أصدق مين ومش عارف أكدب مين..؟!
أصدق الركاب اللى قالوا إن سبب حادث قطار مطروح هو السرعة الجنونية اللى كان ماشى بها السواق.. ولا أصدق خبراء السكك الحديدية اللى قالوا إن "بوجى" القطر هو السبب ..!
أنا شخصيا مصدق خبراء السكة الحديد؛ فالواد "بوجى" من ساعة ما ساب "طمطم"؛ واشتغل فى النقل والسكة الحديد وهو خاربها وعامل كل يوم كوارث وبلاوى..!
نقول إيه.. ربنا يريحنا من "بوجى" بتاع السكة الحديد.. ومن كل بوجى فى حكومتنا الرشيدة..!!
العبد لله اقترح على اتحاد الكرة، من زماااااااان إنه يسيبه من اختياراته "الفكسانة" للمدربين.. ويختار العبد لله، كابتن الكباتن وعم الشباب، مدربا للمنتخب الوطنى.. وأنا كفيل بكل شيء..!
ها أعمل نفس اللى بيعمله كل المدربين: ها ألعب بخطة "بركة دعا الوالدين".. وها اشتم اللعيبة وها اجرى وراهم بالعصاية ..!!
وفوق كل ده وده.. ها اخسر من طوب الأرض.. من كل الفرق الموقوذة والمتردية والنطيحة وما أكل السبع..!
مش عارف فين شفت خلقة مجرم الحرب أبو رخصة سفير العدو الصهيونى فى الأمم المتحدة ؛ اللى هدد بالاعتداء تانى على الشعب القطرى الشقيق..؟!
متهيألى شفته فى فترينة محل.. مقاس ستة وأربعين.. بنى برباط..!