مش هاأتكلم كتير.. لكن أقسم بالله غير حانث أن التاريخ سيذكر للرئيس السيسي أنه أول حاكم فى تاريخ مصر الحديث والقديم يعترض على سير العملية الانتخابية ؛ ويدين التجاوزات فى بعض اللجان.. ويدعو لتصحيح الأخطاء دعما للمسيرة الديمقراطية .
حفظ الله مصر وشعب مصر وقائد مصر.
طبعا كالعادة سيخرج بعض الحنجورية الكارهين لمصر والمصريين ليتهموننى بالتطبيل.. والنفاق.. وباقى الأسطوانة المشروخة إياها.. ولكل هؤلاء أقول: نسيتوا انتخابات زمان بتاعة التسعة وتسعين والتسعة من عشرة فى المية..؟!
طيب بلاش دى.. نسيتوا انتخابات الحزب الوطني اللى أعطى فيها الإخوان 88 مقعدًا زورًا وبهتانًا.. بمناسبة عيد الأم .. ست الحبايب يا حبيبة..!
طيب بلاش دى برضه.. نسيتوا انتخابات 2010 اللى قالوا إنها السبب فى أحداث يناير.. اللى قلبت البلد رأسا على عقب..؟!!
إذا كنتم نسيتوا اللى جرى هاتوا الدفاتر تنقرا..!
ربنا ما يكتب على حد زنقة وكسفة "بتوع إعلام ماقاللى وقلت له يا عوازل فلفلوا"..!
فالكلام اللى قالوه قبل البيان بيقولوا عكسه النهاردة بعد البيان.. على "طريقة كده تسليك.. كدا توليع"..!
يا جماعة.. هذا الإعلام لا يليق بمصر القائدة والرائدة فى المنطقة والعالم..
لابد من تغيير المنظومة الإعلامية الحالية فكرًا وتوجهًا؛ واستبعاد الوجوه التى يكرهها الشعب.. يعنى من الآخر كدا: "انسف حمامك.. قصدى إعلامك القديم"..!!
بالمناسبة.. من بـــاب التكرار اللى بيعلم الشطار أعيد وأزيد وأقول إن إعلام ما قاللى وقلت له ياعوازل فلفلوا لا يبنى وطنا أبدًا.. لكنه يبنى لأصحابه فيلا فى الساحل الشمالى..!
بعدما ما شاهدت ما قاله الكابتن حسام حسن مؤخرًا صوت وصورة.. وتهجمه على بعض اللاعبين.. اكتشفت أن أكبر أعداء الكابتن حسام حسن هو .. الكابتن حسام حسن نفسه بشحمه ولحمه..!
إيه القرف ده..؟!
أنا شايف إن معظم القنوات الفضائية بتصفى حسابات شخصية على حساب المصلحة العامة.. يعنى كلها بطيخ.. لامؤاخذة..!
مع الاعتذار لبتوع البطيخ.. وللبطيخ..!
أنا زعلان من القراء الأهلاوية اللى سابوا المواضيع المهمة اللى فى مقالى الأسبوع الماضى ومسكوا لى فى جون "بن شرقى" اللى جابه فى الزمالك فى ماتش السوبر..!
كلهم بلا استثناء اتهمونى بأننى متحيز للزمالك.. وأننى زملكاوى "أرارى"؛ مما دفعنى إلى القسم بأغلظ الأيمان إننى لست منحازًا لأى ناد ولا لأى حزب.. لكننى منحاز فقط لمصر وشعب مصر وجيش مصر..
وإذا كان على مشجعى الأهلى والزمالك؛ فالدم اللى بيجرى فى عروقى أحمر.. أما قلبى فأبيض.. بخطين..!!