# يانهار ماطلعتلوش شمس..!
بعد ما كانوا بيكتبوا لنا زمان فى ضهر كراريس المدارس نصائح: "كيف تحافظ على نظافتك ونظافة مدرستك"؛ بيعملوا دلوقت برامج توعية للتلاميذ : "كيف تحمى نفسك من ...التحرش" ..!!
ياليلة سودا هو التعليم باظ للدرجة دى..؟!
# يا معالى وزير التربية والتعليم: أنا مايهمنيش معاليك واخد شهادة فى إيه.. ولا من جامعة إيه ..ومعاك شهادة دكتوراة ولا شهادة لا إله إلا الله..؟!!
فديفيد بلانكيت وزير التعليم فى بريطانيا العظمى كان كفيفا.. ونجح فى إصلاح التعليم.. بل وتولى العديد من المناصب الوزارية بعد ذلك..!
فأمام معاليك فرصة ذهبية لدخول التاريخ من أوسع أبوابه..
فمعاليك مسؤول عن تربية وتعليم 26 مليون طالب وطالبة ..وهو عدد يزيد عن عدد سكان عدة دول عربية وأوربية مجتمعة.
سيب مكتبك أنت ومساعديك وانزلوا شوفوا البلاوى والمخالفات اللى بتحصل فى المدارس .. وبالذات المدارس الخاصة.. فالوضع لا يحتمل.
أرجوك افعلها الآن قبل غد.. فبعض مدارس اليومين دول اللى داخلها مفقود واللى خارج منها .. مولود..!!
# الناس اللى هاتخش جهنم حدف بيشيعوا تشنيعة خبيثة على حكومتنا الرشيدة وبيقولوا إنها ناوية ترفع أسعار الكهربا الشهر الجاى بنسبة من خمستاشر إلى خمسة وعشرين فى المية ..!
إيه الكلام الفاضى ده..؟! حكومتنا عمرها ما هاتعمل فينا كدا.. وبعدين هى من إمتى رفعت لنا الأسعار قبل كدا..؟!
فكل تجاربنا مع الحكومة بتؤكد إنها حنينة وطيوبة.. وحاطة الشعب كله فى حبابى عينيها وبالذات "مهدودى الدخل"..!
يااااااه..دا التطبيل لذيذ بشكل..!
بمناسبة التطبيل..عاوز أسأل مشايخنا الكبار إفتونى يرحمكم الله: هو اللى بيطبل للحكومة بيروح فين بالضبط.. بيروح النار وللّا بيروح مارينا..؟!
# مش عارف ليه، بدون مناسبة، افتكرت بيتين شعر حلمنتيشى كتبتهم فى نفس هذا المكان من سنتين لحكومة تانية خالص غير حكومتنا الحنينة الطيوبة قلت فيهم:
ياحكومتنا الرشيدة .. سعيدة ومليون سعيدة
خفى إيديكى علينا بقينا ع الحديدة
بادعيلك من كل قلبى وشاهد على ربى
بادعيلك بالسلامة وتلبسى البيجاما
# عزبة صاحب التأمينات ..!
ياريت أى مسؤول يحاسب أو حتى يعاتب رئيس هيئة التأمينات على ماقاله من أيام لأصحاب المعاشات: "إحنا نفسنا نزود لكم المعاشات بس هانجيب لكم منين"..!
عاوز أرد على حضرته بس أنا مؤدب ومابتخرجش منى العيبة أبدا..!
# مشايخ الفضائيات والمخرجة "إياها"، بتاعة المساكنة والذى منه؛ اللى عايزين يركبوا الترند بالضرب فى ثوابت الدين.. دول عمرهم ماهايركبوا الترند أبدا .. دول ع القليلة هايركبوا صاروخ عابر للقارات إلى.. جهنم وبئس المصير..قولوا معايا آمين.. !