آخر كلام

 طب عيني في عينكو كدا..؟!

بتوع "إعلام ماقال لي وقلت له ياعوازل فلفلوا" اللي كانوا لغاية إمبارح بيطبلوا للحكومة؛ وبيطالبوا الشعب بأكل رجلين الفراخ بدلا من الفراخ.. قلبوا الدفة اليومين دول؛ وبدأوا يتهموا الحكومة بإنها مش حاسة بالشعب اللي بيكح تراب..!
وبيطالبوها بحماية الطبقة المتوسطة اللي بدأت تنقرض.. وهو كلام جميل وكلام معقول ما أقدرش أقول حاجة عنه.. علي قولة المطربة ليلي مراد .
لكن سؤالي لكل هؤلاء البهوات: كنت فين يا لأ.. لما قلتي آه..؟!
 أنا قلبت معايا بضحك وأنا بأتابع كل اللي بيبكوا ويتباكواعلي حال الكورة المصرية وسمعة مصر بعد فضيحة المنتخب في كاس العرب .. بذمتكم أنتم اتفاجئتم أن المدرب عنده اتنين وسبعين سنة وأن اللعيبة كلها كسر.. وأنه لا توجد خطة ولا دياولو.. وأن اتحاد الكورة بيجامل علي حساب مصر وسمعة مصر.. يا جماعة.. أنا قلتها من زماااااان.. مفيش كورة في مصر.. والمنظومة كلها بايظة.. وكل المدربين بيلعبوا بخطة واحدة مفيش غيرها: "بركة دعا الوالدين"..!!
 مش ها أقول أكتر من اللي قلته قبل كدا: المنتخب ده عمره مايجيب بطولة أبدًا..دا مابيجيبش غير ضغط وسكر وشلل رعاش وبس..!
 الحمد لله.. قرعة كاس العالم وقعتنا في مجموعة حلوة..
بس أقول لكم الحق أنا مش خايف من المجموعة اللي وقعنا فيها.. أنا خايف من المدير الفني اللي وقعنا فيه..!!
 يا جماعة والله العظيم المدير الفني لمنتخبنا لا يصلح وإليكم أسبابي: واحد شايف إن ماعندوش لعيبة غير اتنين وربع بس.. ومخاصم تلات أرباع الفرقة؛ ومن دلوقت بدأ يلطم ويقول إنه مرعوب من بلجيكا؛ اللي هايقابلها في الدور الأول لأنها تالت العالم.. دا طبعًا غير عصبيته عمال علي بطال.. وجريه ورا اللعيبة بالعصاية والشتايم..!
يا جماعة إحنا عايزين مدرب بجد مش مدرب علي ماتفرج.. فمصر العظيمة يجب أن تشارك في فرح المونديال كأحد أبطال الفرح مش كـ" عواجيز الفرح".. لامؤاخذة..!
 خلونا نعيش شوية "نوستالجيا": زمان من نصف قرن، عندما بدأت عملي في بلاط صاحبة الجلالة، كان مرتبي37 جنيها وشوية فكة بيجيبوا 3 جرامات دهب بندقي من اللي قلبك يحبه.. وبالمصنعية كمان..!
دلوقت معاشي كرئيس تحرير خدم قضايا الوطن والمواطن، بيجيب جرام دهب واحد بس..!
طبعا هاتقولوا لي ألطم..؟!
بصراحة أنا ماعنديش حيل ألطم.. أنا هاأجيب "لطّامة بالكهربا" أحسن لي..!
 دعوة الأمهات لأولادهم دلوقت وهما رايحين المدارس: ربنا يكفيكم شر المستخبي وشر الطريق وشر المشرفين والمشرفات وموظفي الأمن والدادات.. وشر بلاوي المدارس اللي بيسموها "دولية"..!
"دا.. ولية" اللي ما يقول آمين..!!