آخر كلام

 أكل الغلابة في خبر كان ..!

أنا مش عارف الحكومة سايبة ليه بتوع عربيات الفول والطعمية والكوارع ولحمة الراس والممبار والفشة يرفعوا الأسعار لعنان السماء ويطحنوا الغلابة بلا أدني رحمة..!
حد يتخيل إن بتوع عربيات الفول رفعوا كلهم وفي نفس الوقت سعر"الشقة" لعشرة جنيهات حتة واحدة.. وكأنهم بيبعوا "شقة" في الساحل الشمالي ..!!
وحد يصدق إن سعر كيلو لحمة "الراس" وصل لتلتمية جنيه وكأنهم بيبيعوا لحمة "رأس الرجاء الصالح"..!
وحتي الكوارع.. الكارع الواحد وصل لربعمية جنيه.. والممبار بـ250 جنيها.. والفشة كذلك.. وكأن العجول متربية في مدارس لغات مش في "زرايب"..!
حد يقول لي: طيب و الحكومة تعمل إيه مع بتوع الفول والطعمية والفشة والممبار..؟!
أرد عليه وأقول له: الحكومة لابد أن تتعامل معهم بالقانون.. قانون منع الاحتكار..
فاتفاق بتوع عربيات الفول والطعمية ولحمة الراس علي رفع الأسعار في وقت واحد وبنفس القيمة دا بيسموه في القانون "اتفاقا احتكاريا" له عقوبات صارمة.. تخلي محتكري أكل الغلابة يتلموا ويختشوا علي دمهم ويعرفوا إن الله حق..!
فهل تفعلها الحكومة..؟!
أتمني ذلك.
 بقي وصل بنا الحال إلي الحد الذي أستطيع فيه أن أنتقد بكل حرية الأوضاع اللي مش عاجباني في بلدي دون أن يحاسبني أو حتي يعاتبني أي أحد.. لكنني لا أستطيع أن أنتقد ولو بكلمة واحدة فيلم "الست"..!
دا أنا لو فكرت انتقد الفيلم ها أتبهدل وهايشوهوا صورتي وتاريخي الذي يمتد لنصف قرن خدمة لقضايا الوطن والمواطن؛ زي ما عملوا مع الفنان الكبير محمد صبحي صاحب الرسالة الفنية الهادفة؛ لأنه تجرأ وانتقد الفيلم ..!!
إيه يا جماعة ما تلايموها شوية.. هو فيلم "الست" قرآن لا يأتيه الباطل من بين يديه ولا من خلفــه.. دا مجرد فيلـــم لا راح ولا جه..؟!
فالفنان الكبير محمد صبحي قد يخطئ وقد يصيب.. لأنه بشر.. لذلك ردوا علي نقده بالنقد.. انتقدوه.. لكن لا تشوهوه.. ولا تهدموه..!
 الصحافة فين " ......." أهه..؟!
ما قاله الكابتن حلمي طولان عن كيفية اختياره لتدريب منتخبنا بتؤكد أن المجاملات هي شعار المرحلة ليس في كرة القدم وحدها.. ولكن يبدو أنها في مجالات أخري عديدة.. وهي سبب كل المشاكل التي نعاني منها الآن..!
أنا أفهم أن الواحد يجامل صاحبه بكلمتين حلوين أو بكوباية شاي بالنعناع.. لكن مايجاملوش علي حساب مصلحة بلد بحالها.. لأن دي جريمة لابد من محاسبة ومحاكمة مرتكبيها..!
لك الله يا مصر ياللي فيكي حاجة محيراني.. نزرع القمح في سنين.. تطلع الكوسة في ثواني..!!