راجل "دوغرى".. مالوش فى "البكش"..!
اللى عاجبنى فى ترامب إن اللى فى قلبه على لسانه.. فالراجل دوغرى ما بيخبيش حاجة خالص.. ومابيضحكش على الناس بكلام البكش إياه بتاع قيم العدالة والحرية والديمقراطية الأمريكية..!
فالرجل استعمارى أرارى.. قال أنا عاوز نفط فنزويلا.. فأستولى عليه بعد أن جرجر الرئيس المنتخب والست حرمه فى إنصاص الليالى بهدوم النوم على السجن دوغرى..!
وقال إنه عاوز أموال الخليج؛ ودلوقت عينه على بترول إيران و العراق وناوى يلتهم كوبا وجرينلاند.. ويضم كندا ومش ناقص غير إنه يطالب بالهند والسند والبلاد اللى بتركب الأفيال..!
وسلم لى على الأخت "عدالة" وبنت خالتها الست "حرية"..!
زومبة العمر..!
الأب اللى سمى ابنه ترامب.. واضح إنه بيكره فلذة كبده جدًا.. فقد إدى له "زومبة" عمره.. فمعظم دول العالم تحظر تسمية المواليد باسم "الشيطان"..!
طبعا واحد فلحوص هايقول: يعنى حضرتك بتشبه ترامب بالشيطان.. دا كدا ترامب من حقه يزعل.. بصراحة أنا شايف إن الشيطان هو اللى من حقه يزعل..!!
على فكرة.. من حوالى تلاتين سنة قام مواطن أردنى بتسمية ابنه "إسحاق رابين"؛ تيمنا برئيس الوزراء الإسرائيلى الأسبق..!
وقد كتبت وقتها فى نفس هذا المكان أطالب بمعاقبة الأب؛ وتنبأت بأن يشهد الإبن أيامًا أسود من قرن الخروب؛ وهو ما حدث بالفعل.. فقد وقع الإبن ضحية للتنمر.. وتم طرده من عمله.. حتى اضطر للهجرة لإسرائيل وحصل على الجنسية هناك ..!
وبكدا أصبح ملعونا "رسمى فهمى نظمى"..دنيا وآخرة..!
بتوع إعلام "ما قال لى وقلت له ياعوازل فلفلوا" شغالين ندب وولولة على الغلا والكوا.. وبيقولوا لنا احمدوا ربنا إن الحكومة بتوفر لكم رغيف العيش .. أنا شخصيًا هاأحمد ربنا وهاأبوس إيدى شعر ودقن.. لو اترحمنا من بتوع إعلام "ما قال لى وقلت له"؛ لأن معظمهم تلاميذ نجباء للفنان سعيد الأرتست .. ملك الطبلة ..!
الأخ "الضلالــى" عاشـــق الأضـــواء والكاميرات والبلح الأمهات؛ اللى كان فى جرة وطلع لبرا.. بيقول لكم إن الانتحار مش حرام والمنتحر ليس بكافر.. مش عارف حضرته جاب الكلام ده منين وعايز منه ايه..؟!
هل هى دعوة للناس للانتحار؛ على أساس إن بسلامته جاب النتيجة من الكنترول وعرف إن المنتحر مابيروحش النار.. دا بيروح جنة عرضها السموات والأرض..؟!
يا جماعة امنعوا الرجل ده من الظهور فى الإعلام.. فكلامه بيثير البلبلة وبيهدد الأمن والسلم الاجتماعى؛ فهو من عينة العلم الذى لا ينفع والجهل الذى لا يضر..!
ياريت يشوفلو شغلانة شريفة ياكل منها عيش، بدلاً من هذا المشى البطال.. لامؤاخذة..!