شاربين مية باردة..!
طالما إن وزير الصحة والأجهزة الرقابية شاربين مية باردة وعاملين ودن من طين وودن من عجين تجاه الممارسات الاحتكارية لشركات الأدوية.. وسايبين لها السايب في السايب تعمل ما بدا لها في المواطنين..!
أنا شايف إننا نناشد وزير الصحة في دولة "موزمبييء" الشقيقة التوسط لدي وزير صحتنا الموقرلحل أزمة الدواء والقضاء علي الفوضي في السوق..!
هاتقولوا لي موزمبييء إيه وبتاع إيه.. باين عليك بتهلوس.. أيوه أنا بأهلوس وبأهيص غصبا عني.. لأني دايخ علي دوا لعلاج الهلوسة ومش لاقيه لاهو ولا حتي البديل بتاعه..!!
بالمناسبة.. عيب قوي إنهم يقولوا إن جهاز حماية المنافسة ومنع الاحتكار لابيهش ولا بينش.. وإنه ترك السوق للمحتكرين والمحتكرات الأحياء منهم والأمــوات.. يمارسون فيه الاحتكار عيني عينك دون أي خوف من حساب أوعقاب أو حتي عتاب..!!
ياجماعة عيب.. أنا شخصيا شايف إن الجهاز دا جهازعظيم جدًا زيه زي الساعة السويسرية تمام.. لا بيقدم ولا بيأخر..!!
فيلم أمريكاني هابط..!!
الراجل دخل بكل سلاسة أكثر أماكن الدنيا تأمينا وهو مدجج بكل أنواع الأسلحة: بندقية صيد ومسدس وشوية أسلحة بيضا ..!!
ياسلااااام يا عبد السلام.. دا رايح الجونينة مش رايح يرتكب أكبر جريمة اغتيال ..!!
فكروني بنكتة قديمة بايخة عن كمين مصادرة الأسلحة في إحدي الدول العربية..عندما فوجئوا بإرهابي داخل الكمين بدبابة..سأله الضابط: معاك سلاح..؟!!
رد عليه الإرهابي بكل برود: لأ..!
فأشار له الضابط: طيب.. عدي..!!
خلصت النكتة.. بايخة مش كدا..؟!
بس مش أبوخ من الفيلم الأمريكاني الهابط بتاع محاولة الاغتيال ..!
ملك من ضهر ملك..!
ملك بريطانيا عمل مع "الزبون" الصح اللي كان لازم يتعمله من زمان واللي ماقدرش يعمله معاه أي زعيم في العالم..!
حلق للزبون وغسله وكواه وفضحه فضيحة اللحمة البتلو في عقر داره أمام أهله وناسه؛بل قدام العالم كله.. وإدي له من المنقي خيار.. وألف عليه نكت وضحك عليه طوب الأرض..!
لولا إن التاريخ بيقول لنا إن جلالته من سلالة ملوك ولاد ملوك لقلت عليه إنه ابن بلد أصيل اتولد وعاش في حوارينا المصرية العريقة.. بصراحة دا ملك حقيقي أصلي مش ملك كوتشينة.. لامؤاخذة..!
بعد أن قفزت أسعار الخضار والفاكهة لعنان السماء ومش عاوزة تنزل أبدًا.. ياريت حد ابن حلال يدلني علي خضار وفاكهة أسعارها حنينة استعمال طبيب.. دهان فابريكة ومش راشة دواخل..!!
مش هانرد علي العبيط..!
لسه العبيط إياه بيهرتل ضد مصر وشعب مصر العظيم.. مش هانرد عليه لأن الرد علي العبيط بيعمل له صيت..!