أنا مش عارف الناس اللى هاتروح جهنم حدف عايزين إيه من الشعب.. فبعد ما بتوع "إعلام ما قال لى وقلت له يا عوازل فلفلوا" حاولوا إقناع الشعب بأكل رجلين الفراخ ؛ على أساس إنها مفيدة ومغذية وكلها حنية؛ ظهر لنا رئيس هيئة "قد الدنيا"، بيؤكد أنه بيموت فى هياكل الفراخ وبياكل صوابعه وراها لأنها ألذ.. ألذ..!!
وقال على الهواء مباشرة: إن هياكل الفراخ لذيذة جدًا ولها فوائد غذائية متعددة..ويمكن طبخها بأكثر من طريقة..!!
وكان ناقص يقول إن هياكل الفراخ زى السكر النبات بتدور الكعوب وبتضيع الشحوب وبتجوز البنات..!!
اللى مجننى أن اللى بيتحرش بأنثى واحدة بيحاكموه ويسجنوه.. أما اللى بيتحرش بالشعب كله فلا يتعرض لأى عقاب ولا حساب ولا حتى عتاب.. ولا حول ولا قوة إلا بالله..!
سيكتب التاريخ أن الرئيس ماكرون ، رئيس فرنسا العظمى، مارس رياضته اليومية بالجرى فى أزحم شوارع الإسكندرية وسط المواطنين والسيارات.. وأكل سندوتش كبدة إسكندرانى من مطعم الفلاح الشعبى وحبس ببولة آيس كريم من جيلاتى عزة ..!
يا جماعة الراجل دا دمه زى العسل.. لأنه مصمم ياكل ويشرب زى أى ابن بلد أصيل فى حوارى وقرى مصر..
أنا خايف فى الزيارة الجاية ياكل طعمية بالشطة وفول مدمس بالطحينة والزيت الحار ومعاهم طرشى بلدى وفحل بصل..!
ربنا يستر..!!
كلام الوزراء محتاج ضبط زوايا..!
بدون زعل بعض الوزراء الموقرين زودوها حبتين.. شخط ونطر وتعالى وعنطزة وكلام مايطلعش لا من وزير ولا حتى غفير..!
واللى حصل الأسبوع اللى فات من 3 وزراء بس مجرد عيّنة من وش القفص.. ومش عاوزين نخوض فى التفاصيل..!
بصراحة.. كلام الوزرا محتاج فلاتر وضبط زوايا.. وبلاتين وكوندينسر بالمرة..!
الحمير راحت فين..!
يا ريت الأفندى "إياه" ينقطنا بسكاته..!
فكل شوية يطلع لنا بحكاية ورواية عن الحمير اللى نقصت إتنين مليون حمار حتة واحدة.. حمار ينطح حمارًا.. وهاتك يا كلام ولت وعجن فى الجرايد والفضائيات..!
وطبعًا لازم بسلامته يطرح السؤال الصعب وهو: الحمير راحت فين.. وهنا تبدأ البلبلة والتشكيك.. وكأن البلد ناقصة بلبلة..!
كنت عاوز أرد عليه لكننى مش هاأرد حتى لا أقع تحت طائلة القانون بتهمة السب والقذف..!
إيه الفوضى والهرتلة دى..؟!
إزاى إتنين طن من كتب الوزارة يتسرقوا عينى عينك من مخازن مديرية التربية والتعليم بمطروح ويتباعوا لبتاع روبابيكيا.. من غير ما أى حد يحس أو يدرى..؟!
واضح إن مسئول المخازن وكل اللى شافوه وسابوه متخرجين "بامتياز مع مرتبة القرف الأولى" من.. مغارة السيد على بابا..!!