آخر كلام

 إيه رأيكم فى السيستم..؟!

من غير زعل لو حصلت أزمة "السيستم" بتاع هيئة الـتأمينات فى أى بلد حتى لو فى بلاد الواق واق.. لقامت الدنيا ولم تقعد..!

ومن غير زعل برضه لو استمرت الأزمة دون حل دون أن يصرف الناس معاشاتهم كل هذه المدة فى أى بلد حتى ولو فى الهند والسند والبلاد التى بتركب الأفيال.. لطارت فيها رقاب.. لكننا والحمد لله لا فى بلاد الواق واق ولا فى البلاد التى بتركب الأفيال.. إحنا بتوع حضارة السبعتلاف سنة؛ لذلك الدنيا عندنا آخر انبساط وزبادى فى الخلاط .. صحيح.. إحنا ماعندناش معاشات ولا قمصان كاروهات.. بس عندنا سيستم.. إيه رأيكم فى السيستم..؟!

 تصريح حكومي خفيف الدم..!

واضح إن نائب رئيس الوزراء للشئون الاقتصادية راجل ابن نكتة رغم مظهره الجاد الصارم .. فقد أطلق معاليه، منذ أيام، تصريحا "خفيف الدم" أكد فيه أن الحكومة لن ترفع أسعار الوقود حتى نهاية السنة المالية الحالية.. والتى لم يتبق منها إلا شهر واحد فقط..!!

وقد لا يعرف الكثيرون أن معاليه هو إبن أستاذنا الكاتب الكبير خفيف الظل محمد أحمد عيسى؛ والذى شرفت بصداقته عندما عملنا معا فى جريدة "الجمهورية" منتصف السبعينيات.. ويبدو أن نائب رئيس الوزراء قد ورث خفة الدم عن الوالد أستاذنا الكبير.. لذلك يبشر المواطنين، اللى بيكحوا ترابًا، بأن الحكومة لن ترفع الأسعارخلال شهر واحد فقط من الآن.. وهى بشرى سارة.. ظاهرها فيه الرحمة وباطنها من قبلها العذاب.. ربنا يستر..!

 "القوطة".. مش مجنونة..!

ينقطع لسانه من لغلوغه كل اللى يقول إن "القوطة مجنونة" بعد أن تجاوز سعرها الستين جنيها حتة واحدة.. القوطة يا جماعة مش هى اللى مجنونة..التجار الفُجّار هم اللى مجانين وستين مجانين كمان.. ومكانهم مش فى الأسواق لكن فى"السراية الصفرا"..!

وطالما إن أجهزة الرقابة لا ترى ولا تسمع ولا تتحرك.. وسايبة المجانين طايحين فى الشعب .. فأنا شايف إن الحل فى إيد صديقى الدكتور عماد مشالى مدير عام مستشفى الأمراض العقلية بالعباسية.. اللى لازم يدعو التجار لقضاء "الفاكانس" بتاعهم فى مستشفاه.. فاللى بيعمله التجار دا بيؤكد إنهم مجانين رسمى ماركة "خالتى شفيقة" اللى عندها شعرة .. ساعة تروح وساعة تيجى.. هييييييه....

رااااااحت..!!

نقول إيه.. ربنا يشفى..!

 يا ريت يبطل هبد..!

ياااااه.. أخيرًا دار الإفتاء ردت على الأخ "الضلالى" إياه عاشق الأضواء والكاميرات والبلح الأمهات؛ اللى بيقول: إن الأضحية مش لازم تكون من الأنعام.. دى ممكن تبقى فرخة أو ديك..!!

الإفتاء أكدت أنه لا يجوز أن تكون الأضحية من الطيور؛ بل من الأنعام فقط.

ياريت بقى يتلهى على عينه وينقطنا بسكاته ويبطل هبد..!