دا كاس عالم.. مش كاس دوران شبرا..!
يا جماعة مش عاوزين فضايح..حد يفهمه إن الدبدبة على الأرض وشد الشعر و الإعتراض والصريخ فى وش الحكم عمال على بطال ماينفعش.. فالعالم كله بيتفرج علينا.. دا كاس عالم مش كاس دوران شبرا.. لامؤاخذة..!
مشروع قومى للسرايا الصفرا..!
عندى فكرة بمليون جنيه لحكومتنا الموقرة زى ماعملت لنا ميناءا لليخوت واعتبرته مشروعًا قوميًا؛ تلبية لاحتياجات الجماهير العريضة اللى مش عارفة تركن يخوتها فين.. أقترح أن تعمل الحكومة "مشروعًا قوميًا للسرايا الصفرا".. فحسب معلوماتى أن عدد الناس اللى اللى بيكلموا الكراسى الفاضية وبترد عليهم زاد جدًا اليومين دول..!
ربنا يستر.
يعنى نائبة محترمة ب مجلس النواب الموقر سابت كل المشاكل اللى بيعانيها المواطن البسيط؛ وتقدمت بطلب إحاطة لمناقشة أسباب انخفاض أسعار البيض ؛ وبتطالب بالتدخل لإنقاذ المنتجين..!
طيب ليه حضرتها عملت نفسها من بنها لما التجار ولّعوا الأسعار طوال السنين اللى فاتت؛ ولم تطالب أحدا بالتدخل لإنقاذ المواطنين الغلابة..؟!
نصيحة لوجه الله من العبد لله: يا نواب برلماننا الموقر.. استقيموا يرحمكم الله.
"الكوسة" مش عايزة تجيبها لبر..!
يا جماعة حد يشوف لنا إيه حكاية الكوسة دى اللى أسعارها بقت فى السما..
الكيلو عدى الأربعين جنيها وزيادة..!
الناس مش عارفة "تمشى مصالحها".. لا عارفة تدخل ولادها مدارس ولا عارفة توظف ولادها.. ولا عارفة تسلك أمورها فى المصالح والهيئات والبلح الأمهات..!
إيه وقف الحال ده..؟!
إيه السماجة دى..؟!
الأخ سومة العاشق حساس الجيل؛ اللى هايموت ويركب التريند؛ بعد ماكان راشق فى سرادقات العزاء كتفا بكتف بياخد العزا مع أهل المتوفى وهو بيبكى بدل الدموع دم.. وسع نشاطه اليومين دول وبقى بيحضر أفراح وليالى ملاح..!
ومش بعيد بكره نلاقيه فى حفلات الطهور لابس جلابية بيضا جنب "العريس" وبيغنوا له: يا عريس ياصغير.. علقة تفوت ولا حد يموت.. لابس ومغير وهاتشرب مرقة كتكوت..!!
يخرب بيوتكم..!
واحد من "إياهم" عاوز يركب التريند بيشجع الناس على شرب الخمرة وبيقول إن كل رؤساء مصر كانوا بيشربوها علشان يروقوا دماغهم.. دا كان ناقص يقول زى ما قال إستفان روستى إن الشمبانيا مشروب البنت المهذبة..!
ونفس هذا الواحد النكرة قال للمذيعة بغضب: الحجاب مش من الإسلام.. قولاً واحدًا..!
يا سيدى ماحدش ألزمك بحاجة.. إحنا فى بلد حر.. عاوز حضرتك تلبس الحجاب إلبسه.. مش عاوز تلبسه ماتلبسوش..!