حرامى بختم النسر..!
واضح إن اللى عمل نظام شرايح استهلاك الكهرباء تلميذ نجيب لـ" أبو حلموس" الحرامى.. اللى ياكل مال النبى ويحلى بالصحابة..!
فأذكى إخواته عامل نظام؛ عبارة عن سلسلة عقوبات قاسية لكل المستهلكين تنتهى بغرامة ضخمة جدًا؛ وكأن بينه وبين الشعب تار بايت..!
أبو حلموس بتاع الكهربا هو هو الخالق الناطق أبو حلموس بتاع نجيب الريحانى حرامى آه.. لكن مع عظيم الأسف والأسى "حرامى بختم النسر"..!!
اللى يحرق الدم إن واحد من بتوع إعلام ماقال لى وقلت له ياعوازل فلفلوا طالع يقول لنا: احمدوا ربنا.. إن الكهربا غليت بس مابتتقطعش..!!
ناقص يقول لنا: أنتم عاوزين تنهبوا.. ناس طماعة مايملاش عينها غير التراب..!
بتداوى ممدوح وجوزها مبطوح..!
مش عارف أضحك وللّا أعيط من التصريح اللى بيؤكد استعداد الحكومة لنقل خبرتها فى الإصلاح الاقتصادى لدول أخرى؟!
فكرنى بالمثل اللى بيقول: سايبة جوزها مبطوح ورايحة تداوى ممدوح..!!
الناس قطعت الخلف..!
آخر أرقام الجهاز المركزى للتعبئة العامة والإحصاء بتشير إلى انخفاض تاريخى فى معدلات الإنجاب من 2.8إلى2.3 طفل لكل سيدة.. وانخفاض عدد المواليد لأقل من
2 مليون مولود لأول مرة منذ سنوات طويلة..!
سؤالى الساذج هو: الناس قطعت الخلف ليه..؟!
فينك يا عم أنيس يا عبيد..؟!
تصريحات بعض المسئولين، اليومين اللى فاتوا، محتاجة ترجمة من أنيس عبيد..!
فهم يقولون الكلام وعكسه فشر الفنانة سناء جميل اللى كانت بتضحك وبتعيط فى نفس ذات الوقت..!
بيفكرونى بـ"فصاحة" منصور ابن الناظر فى مدرسة المشاغبين.. إنجليزى دا يا مرسى..؟!
الخفافيش على قفا من يشيل..!
عيب قوى إن الناس نازلة تريقة على الأفندى اللى بيطالب المصريين بالجوع وأكل الخفافيش.. وعيب قوى إن أحد قرائى المحترمين يقول: دا حتى الخفافيش مش لاقيينها..!
يا جماعة اتقوا الله.. خفافيش إيه اللى مش لاقيينها.. دى الخفافيش مرطرطة ومالية البلد وعلى قفا من يشيل.. خفافيش بيضا وحمرا.. بلدى ومزارع..!
دا مش بعيد الحكومة تصرف خفافيش على بطاقة التموين مع الزيت والسكر ورغيف العيش؛ اللى لابينفع يتاكل ولا حتى يتحلف عليه..!
بطلوا استفزاز..!
مش عارف إيه سبب إصرار بتوع إعلام ما قال لى وقلت له ياعوازل فلفلوا على استضافة الوزير الفاشل إياه علشان يقول للشعب حكم ومواعظ؛ بعد ما كان بيقول وهو فى المنصب: لو مالقيناش فلوس لسداد خدمة الديون نستدين تانى وتانى.. وتانى.. ماعندناش حلول أخرى..!
بطلوا استفزاز إحنا فينا اللى مكفينا.. مش ناقصين حكم ومواعظ من زعيط و"معيط" ونطاط الحيط..!