الخال الطيب والعم الشرير..!
أنا كمواطن صالح على نياته ماشى جنب الحيط، كنت أظن وإن بعض الظن إثم.. إن الحكومة الحالية زيها زى كل الحكومات السابقة فيها الخال الطيب اللى عاوز يخفف الأعباء عن الشعب؛ وفيها العم الشرير اللى عاوز يحلب الشعب..! لكننى بعد العشرة الطويلة اكتشفت إنى راجل ساذج.. وإن الحكومة الحالية كلها على بعضها مافيهاش ولا خال واحد.. فكلهم طلعوا "أعمامنا"..!
جوز الإتنين..!
بصراحة هو اللى غلطان من ساسه لراسه.. فيه حد عاقل يتجوز "حكومتين" مرة واحدة..؟!
دا الواحد مش قادر على حكومة واحدة مورياه النجوم فى عز الضهر.. رافعة له أسعار الكهربا والمية والغاز والبنزين.. وفارضة ضريبة على كل شىء وأى شىء ومش ناقص غير الهوا اللى بنتنفسه..!
طبعا أنا ما أقصدش اللى فى بالى بالكم.. حرام عليكم صفوا النية وبلاش إفترا..!
بركاتك ياست" أبو القفطان"..!
مش عارف الناس زعلانة ليه من البنت المفعوصة، اللى ماطلعتش من البيضة، لأنها عملت محضر لأبوها فى قسم البوليس؛ لأنه رفض يخليها تروح فرح صاحبتها..؟!
ياجماعة البنت بتطالب بحقوقها على طريقة طنط "أبو القفطان" اللى بتقول إن الست مش ملزمة تبات فى بيت جوزها.. وإن الراجل فى البيت مجرد أباجورة وكيس جوافة وشرابة خرج..!
أنا شايف إن البنت المفعوصة عداها العيب وقزح.. فمن حقها تعمل ما بدا لها.. واضح إننا داخلين على أيام أسود من قرن الخروب.. ربنا يستر..!
للفرحانين بملابسهم الداخلية..!
كل واحد من حقه يفرح بملابسه الداخلية فى أوضة نومه؛ لكن ما ذنب الناس إنها تشوف الأشكال دى صوت وصورة وعلى الهواء مباشرة..
على فكرة الكلام دا مش بس عن الأفندى إياه اللى صوته يقرف.. الكلام دا عن قائمة طويلة عريضة من رجال الأعمال والمطربين وغيرهم اللى بيتصوروا بملابسهم الداخلية والبيجامات فى المناسبات والأفراح والليالى الملاح..!
واضح إن اللى اختشوا ماتوا وشبعوا موت..!
الريس حنفى شيخ الفنانين..!
سايق عليك النبى تنقطنا بسكاتك وتبطل تهديدات فارغة لفلان وعلان وترتان.. نمبرون مين اللى مش هاتخليه يغنى بعد كدا..؟!
ياراجل شكلك بقى وحش.. دا أنت غلبت الريس حنفى شيخ الصيادين اللى كلمته مابتنزلش الأرض أبدا.. بس هاتنزل المرة دى..!!
واحد تانى من بتوع إعلام ما قال لى وقلت له ياعوازل فلفلوا عامل فيها شهيد وبيقول إنه مابياخدش أجازات خالص من أجل مصر وشعب مصر..!
ياعم الحاج: أرجوك خد أجازة..علشان ترتاح .. وتريح مصر وشعب مصر..!