آخر كلام

 بطولاته بعدد شعر راسه..!
ليه حق يتبغدد ويعمل كل ما بدا له.. يلعب بخطة "بركة دعا الوالدين"؛ ويمسح البلاط بنجوم مصر الكبار.. ويهرتل بكلام لا بيودى ولا بيجيب فى المؤتمرات الصحفية فشر "منصور ابن الناظر" فى مدرسة المشاغبين..!
بصراحة من حقه يعمل كل ده وأكتر .. يكفيه شرفا إنه جاب لمصر بطولات.."بعدد شعر راسه"..!!

 ليه بيحبطوا الناس..؟!
يا جماعة اللى بيعملوه بتوع "إعلام ما قال لى وقلت له ياعوازل فلفلوا" جريمة فى حق الوطن والمواطن لازم يتحاسبوا عليها..!
فكلهم شغالين اليومين دول زن على ودان الناس عن المصايب اللى جاية واللى هاتنزل على رؤوسهم زى القضا المستعجل من غير أى إحم ولا دستور..!!
سؤالى الساذج قوى: هما ليه بيشيعوا السواد والإحباط واليأس بين الناس وفى هذا التوقيت بالذات.. سؤال غريب ماجاوبش عليه ؛على قولة المطرب الشعبى المحبوب محمد عبد المطلب..!

 الكوسة وسنينها..!
الناس هاتطبخ إيه.. الكوسة بقت بخمسين جنيه.. ياعالم ياهوووو.. دى الكوسة هى اللى بتمشى كل حاجة فى البلد.. فى المصالح والهيئـــات و المــدارس والجامعـــات.. إزاى نستغنى عنها..!!
الصبر يا رب.

 زحمة وزارات..!
بالله عليكم.. ما هو دور وزارة الدولة للإعلام مع وجود ثلاث هيئات مسئولة بنص الدستور عن الصحافة والإعلام..؟!
وبالله عليكم ما هو دور وزارة الشباب والرياضة مع وجود كل هذه المجالس والهيئات.. وهل يحتاج التموين أو العمل أو البيئة أو الثقافة أو الاستثمار أو الصناعة لوزارة..؟
لقد مر 3 شهور على خلو منصب وزيرة الثقافة.. فلم تتأثر ثقافة البلد ولا مثقفى البلد.. يعنى أحمد زى إزدحمد..!
يا جماعة.. صدقونى.. كل وزارة من دول يمكن أن تقوم بعملها هيئة أو مجلس أو حتى مجرد مكتب.. إلغوها ووفروا فلوس الشعب وبلاش بهرجة فاضية.. إلغوها يرحمنا ويرحمكم الله..!

 محمد صلاح وعلى الحجار..!
رئيس الأوبرا - قبل استقالته - عمل أزمة مع الفنان الكبير على الحجار هى الخالق الناطق الأزمة اللى عملها المدير الفنى للمنتخب مع النجم العالمى محمد صلاح ..!!
فزى ما مدير المنتخب علق على انسحاب صلاح، مؤكدًا أن المنتخب مش هايقف على لاعب واحد؛ فمصر فيها 120 مليونا.. رئيس الأوبرا بيقول نفس الكلام وبيعلق على انسحاب على الحجار من مهرجان الموسيقى العربية، لأول مرة منذ أربعين عامًا، بأنه عاوز يدى فرصة لأصوات جديدة.. يا ليلة سودا.. هى بقت كدا.. واضح إن قوتنا الناعمة بتضيع يا وديع..

 مفيش دم..!
الشتائم التى تقيأها النتن ياهووو على منصة الأمم المتحدة بتؤكد أن مراكز الدم فى الكيان الصهيونى بتعانى من أزمة حادة..!
ماعندهمش دم..!