قضيت معاك نصف ساعة مرح وضحك .. شهيرة تروى اللحظات الأخيرة فى حياة الفيشاوى

كتب: محمد عفيفى   نشرت الفنانة شهيرة عبر صفحتها الشخصية على موقع «فيس بوك» تفاصيل أخر لقاء جمعتها بالفنان فاروق الفيشاوى قبل وفاته وعبرت من خلالها عن اشتياقها له. وكتبت قائلة: "فاروق أنت مشيت، هو كده خلاص يعنى؟! يا أجدع وأحب خلق الله من إمبارح وأنا مش مصدقة، لأن قبلها بيوم كنت عندك فى المستشفى وكانت الزيارة ممنوعة بس أنت لما عرفت إنى موجودة طلبتنى أدخلك وقضيت معاك فوق نص الساعة من المرح والضحك وكأنك لست مريضًا فى حالة خطرة". وأضافت: "كنت قويًا ومتجاهلًا ما أنت فيه، وتحكى حكايات من هنا وهناك كأنك تعانى من نزلة برد ونزلت من عندك راضية بروحك المعنوية المرتفعة" . وأضافت: "لذلك كانت صدمتى كبيرة لما بسأل عنك تانى يوم قالولى أنتِ آخر صديقة شوفتيه فى حالته الطبيعية، لأنه النهاردة راح فى غيبوبة، طب إزاى ده كان كويس إمبارح بروحه العالية ده كان بيضحك ده كان بيحكى على نوادره مع صديقه محمود الجندى وعلى فلان وعلان" . وتستكمل: "طب إزاى بسرعة كده. طب إزاى إزاى! سبحان الله (بين طرفة عين وانتباهتها يغير الله من حال إلى حال) دموعى تتسابق مع نفسها ولا تريد أن تهدأ" . وأضافت: "طب إزاى وأنتَ من أعز الأصدقاء للعيلة كلها وانهيار ابنى عمرو بالبكاء عندما رأى النعش بتاعك أمامه، وشريط ذكريات أونكل فاروق أمامه، الشهامة والرجولة والجدعنة". واختتمت حديثها : "أنت يا فاروق صاحب المواقف الصعبة مع كل الناس، مستحيل لم تترك بصمة مع كل من عرفك واقترب منك. مع السلامة يا حبيبى، اللهم تقبله بقبول حسن وسامحه واغفر له واعفُ عنه واجعل ليلته أجمل ليلة وثبته عند السؤال ونور قبره واجعله روضة من رياض الجنة فليس هناك "أحن منك علينا يا رحمن يا رحيم". [caption id="attachment_312099" align="aligncenter" width="631"] الفنانة شهيرة[/caption]