كتب: أحمد حمدي
حكت «عزة المصري» والدة الطفلة المعتدى عليها من أحد كلاب الشوارع بمحافظة الإسماعيلية، تفاصيل ما حدث لإبنتها و حالتها الصحية.
وقالت "المصرى" عبر فيسبوك: «السلام عليكم أنا ماما «هنا مجدي» اللي محجوزة دلوقتي في المستشفي العام، اللي حصل بالضبط وهي ماشية بتعدي الشارع؛ شافت كلب جري وراها، خافت منه و جريت؛ خبطتها عربية ونطرتها علي الرصيف، دماغها اتفتحت ومناخيرها اتكسرت وسنانها اتكسرت وشفايفها اتفتحت من الداخل للخارج، وكدمات واتسحلت في جسمها من ايديها ورجليها وكمان نزيف داخلي في معدتها، ولا الكلب لمسها خالص."
وأعربت "المصرى" عن أسفها على التعليقات المسفة فقالت: " بس بجد عيب اأوي كمية الكومنتات اللي اتقالت وانتوا متعرفوش اصلا تفاصيل الحادثة ولا بتراعوا أي مشاعر لأم مع بنتها في المستشفي، ولا تعبانه معاها ولا مصدومة من اللي حصلها، ولا تعب و ألم بنتها."
وأنهت الأم الحزينة التعليق قائلة: "بدل ماتكتبوا وانتوا متعرفوش حاجة تعالوا المستشفي اطمنوا عليها اقفوا جمبنا، راعوا مشاعرنا يا جماعة ومفيش داعي لكلامكوا بجد من ضرب بواني من عضه، طلب بجد مش عارفه اني أقول غير حسبي الله ونعم الوكيل."
