شاركت الفنان الشابة جلا هشام صاحبة الحضور اللطيف والملامح الجميلة، في حكاية بدون ضمان من مسلسل "إلا أنا"، وقامت بدور فتاة تدعى هدير، وهي فتاة تسببت في الكثير من المشاكل بين شقيقها الفنان إسلام جمال، وزوجته الفنانة هنادي مهنا، وتدخلت كثيراً في حياتهما الشخصية، مما أدى إلى طلاقهما.
وفي حوار خاص لـ مجلة أكتوبر مع الفنانة جلا هشام، أجابت جلا على مجموعة من الأسئلة حول دور "هدير" في الحكاية الذي أثر في الجميع:
- ما رأيك في شخصية هدير؟
- جلا: "رأي في شخصية هدير أنها حد أتحط في ظروف نفسية صعبة جداً، فـ عدم وجود الأب وعدم وجود الخصوصية، والنشأة في بيت في تفضيل الأخ عليها، ده خلاها شخص مش سوي، وعدم وجود شغل او هواية دي حاجة تخلي تصرفات غير طبيعية تطلع من البني أدمين، ومش عارفة لو حد اتحط في نفس ظروفها كان عمل أي، وأنا شخصيا كنت متعاطفة معاها جداً".
- هل كان لديك توقع أن الجمهور سيتعاطف مع شخصية هادير؟
- جلا: "كنت حاسة إن دا هيحصل، ولو كان دا محصلش كنت هتضايق أوي، لأن من ساعة ما المسلسل نزل وأنا مستنية الحلقة الأخيرة، عشان أطمن أن لو دا حصل يبقي أنا كدا تمام، وعرفت أعمل اللي أنا كان نفسي أعمله في هدير".
- هل كانت شخصية هدير نتيجة تربية أم بسبب حالة نفسية؟
- جلا: "أنا شايفة انها حاجات كتير مع بعض، يعني البيئة اللي نشأت فيها وشخصية مامتها متسلطة ومتدخلة، ومبتحترمش الخصوصية، وتفضيل الاخ وعدم وجود الأب، ووجود السوشيل ميديا وكل دا بيخلق من البني أدم شخص غير سوى، وكلنا مرضر نفسيين بشكل أو بآخر وكلنا محتاجين نروح لدكاترة، بس اعتقد انه عدم الإدراج هو اللي بيوصل للمرحلة دي".
- هل بعد هذا الدور من الممكن أن تصبحين محاصرة في أدوار الشر فقط؟
- جلا: "أنا مرعوبة وبحاول جداً أني أنا يبقي عندي القدرة أني اقول لاء لو جالي أدوار شبه كدا تاني، عشان محسش أني محاصرة في الادوار دى، ويبقي عندي القدرة أني ابقي متنوعة أكتر شوية".
- لماذا وافقتِ على هذا الدور رغم الانتقادات التي تعرضتِ لها بعد دور ياسمين في مسلسل "خلي بالك من زيزي"؟
- جلا: "لأن مسلسل "إلا أنا" مسلسل مهم جداً، وليه شعبية كبيرة جداً، وأني أنا أكون جزء منه دي حاجة كبيرة ليا جداً، وإضافة ليا كمان، والحمد لله الحكاية اللي كنا فيها بالذات عملت صيت غير عادي لأسباب مختلفة، والحمد لله كان قرار كويس".
- هل ستوافقين على مثل هذه الأدوار مرة أخرى أم لا؟
- جلا : "مش عاوزة اقول لاء ويطلع شكلى وحش واعمل، لكن هحاول الخطوة اللي جاية تكون مختلفة، ولو في دور خطير وعجبني وهحسه تحدي بالنسبالي هعمله".
- ما هو رأيك في تجربة مهرجان الجونة؟
- جلا: "لذيذ أن في مهرجان الناس بنتجمع فيه على حب السينما، بس بالنسبالي كان موتر اوى، فكرة السجادة الحمراء وإنك قاعدة في تجمع ناس كتير عارفاكي، بالنسبالي بشكل شخصي كان موتر أكتر ما هو ممتع، وكنت مبسوطة أن كان في أفلام كتير موجودة لأني بحب الأفلام جداً، وكنت في السنيما بتفرج على اربع وخمس افلام في اليوم، واحب جدا التركز على اد اي الافلام خطيرة بغض النظر عن اي حاجة تانية بتتقال على المهرجانات مش الجونة بس".
- إلى أي مدى كانت تجربة مهرجان الجونة مؤثرة في شخصية جلا؟
- جلا: "كانت تجربة موترة جدا لشخصيتي مش عشان هي كدا، وإن لو سألت حد هيقولك دي جملة، وانا بيجيلي توتر من حاجات بسيطة جدا، وفكرة الاهتمام بـ ان شكلي لازم يكون مظبوط في وقت من الاوقات، وانا اصلا حد بيحب ينزل بالشبشب في الشارع، فالموضوع كان مختلف، وكانت تجربة مهمة ولازم أعملها، وحبيت افلام كتير جدا في المهرجان واتعلقت بيها".
وصرحت الفنانة الشابة جلا هشام أن هناك احتمالا أن تقوم بعمل فني قريبًا، إما في السينما أو في الدرما التلفزيونية.
ويذكر أن كانت حكاية "بدون ضمان" من تأليف يوسف وجيه وإخراج ياسمين أحمد كامل، وكانت هذه المشاركة الأولى للفنانة الشابة جالا هشام في سلسلة قصص "إلا أنا".
والجدير بالذكر أن شاركت جلا هشام في رمضان الماضي بدور ياسمين في مسلسل "خلي بالك من زيزي"، كما ظهرت بشخصية نهى في مسلسل "نجيب زاهي زركش"، وفي الوقت نفسه لعبت دور ماري في مسلسل "موسى" مع النجم محمد رمضان.