عيب أوى أن يشيع البعض ظلمًا وعدوانًا أن أصحاب المعاشات أصبحوا على الحديدة.. عيب وألف عيب..!!
فبتوع المعاشات مش على الحديدة أبدًا.. دول باعوا الحديدة من زماااااااان...!
بسم الله ما شاء الله البلد كلها انقسمت نصين.. نص خبراء استراتيجيين وخبراء فى السياسة والشئون الاقتصادية والذى منه.. والنص التانى خبراء وباشمهندسين بيفهموا فى الطرق والكبارى وكافة شىء..!
النص الأولانى خرم ودان الناس بالتنظير والآراء اللوذعية فى الاقتصاد والسياسة.. التى ما أنزل الله بها من سلطان..!
أما النص التانى فشغال دلوقتي تنظير فى شئون الهندسة والطرق والكبارى.. فالكوبرى الفلانى كان لازم يتعمل بالطريقة العلانية.. والطريق الفلانى كان لازم يوصل للشارع العلانى.. إلى آخر ذلك من الآراء والفتاوى الهندسية التى لا صلة لها لا بالهندسة ولا بالبطيخ..!!
يا جماعة ارحمونا وبطلوا فتاوى وسيبوا أهل الاختصاص يشتغلوا.. ده أجدادنا قالوها حكمة من زمان: "إدى العيش لخبازه"..!!
وبعدين ماتفقعوش مرارتنا.. لأن إحنا معندناش غير مرارة واحدة.. وكل اللى موجود فى السوق إما بالشىء الفلانى أو صينى مضروب مع أول زعلة بيفرقع.. ارحمونا..!!
للمرة الألف بقول وأعيد وأزيد إن البورصة المصرية بعافية حبتين ومحتاجة خبراء بجد يعالجوها بعيدًا عن هيئة الرقابة المالية ورئيسها؛ اللى كان رئيسًا للبورصة من قبل.. والذى كافئوه وعينوه رئيسًا لهيئة الرقابة المالية..!!
يا جماعة المرحلة الحالية بحاجة ماسة لبورصة قوية تتسم التعاملات فيها بشفافية وعدالة كاملة، خاصة بعد البدء فى بيع شرائح كبيرة من أصولنا المعتبرة بقطاع البنوك والصناعة وغيرها والتخطيط لبيع أصول أخرى مهمة فى الفترة القادمة..
لقد وعدنا رئيس الوزراء فى أول وآخر مؤتمر صحفى عالمى يعقده؛ والذى عرض فيه الخطة الاقتصادية للحكومة بإصلاح حال البورصة وحدد الإجراءات التى ستتخذ.. ومرت الأيام ولم نر أى تحرك تجاه هذا الملف الخطير والمهم..!
صدقونى.. أول إجراء يجب أن يتخذ لإصلاح حال البورصة هو تغيير الوجوه التى شاخت على الكراسى فى البورصة وهيئة سوق المال..!
يا جماعة أنا محتار والحيرة هتقتلنى..!!
فبعد ما أعلنوا عن الفيلا أم 111 مليون جنيه بالساحل الشمالي.. وأنا مبنامش الليل.. فالسعر لقطة ومش هيتعوض.. والمعاش ميجيبش غير فيلتين بس؛ وأنا عاوز أجيب لكل ولد من الولاد فيلا.. هل ينفع آخد قرض من البنك بضمان المعاش؛ ولا أدفع كاش وخلاص وأريح دماغى..!!
على فكرة نسيت أقول لكم الشتيمة حرام فى شهر ذى الحجة المفترج..!!