الشعب المصري دمه زي الشربات

الشعب المصري دمه زي الشرباتمحسن حسنين

الرأى30-5-2023 | 13:43

والله العظيم الشعب المصري دمه زي الشربات مالوش كتالوج..!!

فبعد تضاعف أسعار اللحوم ومعها أسعار الأضاحي.. انفجرت ماسورة نكت وتريقة على أسعار العجول اللي بقت تحير "العجول".. قصدي العقول بس بالصعيدي..!!

آخر نكتة أطلقها المصريون هي عن قائمة أسعار العجول السنة دي:

فأول سعر هو سعر الفئة الأولي من العجول والتى يبلغ سعرها 63 ألف جنيه وهي تتميز بفتحة سقف.. و كوارع سبور.. وسنتر لوك..!

أما الفئة التانية من العجول فهى فئة "الأمبيشن" وسعرها يبدأ من 70 ألف جنيه.. وهي تتميز بسبويلر فى العكاوى.. فرامل فى الحوافر "أى بى إس".. وفوانيس زينون ..!!

وتالت فئة هي فئة "الهاى لاين" وسعرها يبدأ من 82 ألف جنيه.. وهى باور بالكامل.. دهان فابريقة أصلى مش راشش دواخل..!

أما رابع فئة فهى "التوب لاين" وسعرها يبدأ من 90 ألف جنيه.. والعجل كامل كماليات بره وجوه.. عكاوى و كوارع وفشة وممبار وكرشة ولحمة راس وكافة الكماليات..!

كما يوجد عجول أوبشن كامل بفتحة سقف وسينسور بارك.. وعجول كسر زيرو..!!

مش باأقول لكم شعب دمه زى الشربات مالوش كتالوج..!!

بالمناسبة.. نكتة، لسه مألفها دلوقت، بتقول إن البوليس مسك واحد كان بيشرب سيجارة ملفوفة بتلاتة جرام.. لحمة مفرومة..!!

بايخة مش كدا..؟!!

بعد أن قررت وزارة التعليم الصينية إضافة مادة دراسية لتنمية الرجولة لدى الطلاب.. أنا شايف إننا نبعت التجار الفجار، اللي مايعرفوش ربنا ورافعين الأسعار عمال على بطال، بعثة للصين علشان يتعلموا المروءة والرجولة من أول وجديد..!!

فالرجولة هي الحاجة الوحيدة فى الدنيا اللي مالهاش قطع غيار.. لا مؤاخذة..!

بعد أن أكد عـــدد من كبــــار الفنانـــين المصريين أن الفنانـــة إياهــــا نقلـت رســومات الفنــــــان الروســـــى "نقــــــل مســـطرة".. مش عارف ليه بعض إعلاميي الغبرة بيدافعوا عنها باستماتة؛ بل وصلت بهم البجاحة إلى "قلب الآية" وإتهام الفنان الروسى بالسرقة منها..؟!

يا جماعة لابد من تدخل الجهات المعنية لوقف هذه المهزلة التي تضر بسمعة مصر وفناني مصر؛ ومحاسبة أو معاقبة هذه الفنانة التي تكررت سرقاتها للفنان الروسي بالذات..!!

وإذا كنتم نسيتوا اللي جرى هاتوا دفاتر جدار محطة مترو كلية البنات تتقرا..!!

أضف تعليق

الكنز المصري (1-2)

#
مقال رئيس التحرير
محــــــــمد أمين
إعلان آراك 2